金龍泉餐廳 美孚

金龍泉餐廳 評價 相片

今朝早左起身，見仲有時間就落黎茶記食個早餐先，一大朝早都唔少人喎，不過大部分係地盤佬居多。

叫左呢個五香肉丁麵，個麵係出前一丁麵，五香肉丁當然係罐頭啦，但係食得到肉丁有輕輕煮熱，咁已經唔錯啦。

麵就算煮得唔差，唔淋唔硬。

煎蛋有少少流心，唔係全熟果隻，火腿就正常，不過溫度已經凍左。

個牛油麵包就好多牛油，麵包質地就太淋了。

呢個港式早餐就味道正常，不過餐廳衛生程度就絕對需要改善。

現在很多街坊茶餐廳, 在晚市都有提供小炒菜式, 金龍泉係其中一間, 質素絕不比小炒大排檔差。

是日推介:1) 魚香茄子煲: 很香, 茄子很入味, 一味菜已足夠送飯。

2) 京都骨: 味道方面不俗, 最緊要肉質很Q, 唔太硬。

3) 燒味: 老實說, 絕不比“太興”差, 但價錢絕不比“太興”貴。

4) 粉絲雜菜煲: 能夠把媽媽常說的下等食材, 造出這麼好味道, 很有誠意。

整體來說, 味道不俗, 價錢經濟, 唔想煮飯時, 係個唔錯的選擇。

翻兜指數: 5分 (滿分為5分)

前日我外買一盒監局雞飯, 返去打開, 全盒都係下欄雞骨(兩舊腳及腿骹骨, 一大舊股骨, 幾舊皮包骨嘅背脊骨, 最後重搵埋雞翼尖), 即刻打去投訴, 個收銀話"你又唔打開睇吓先, 而家走咗無得換!" 我話我已經影咗相, 個收銀話"影咗相就得喇, 聽日你同太子女講喇!"因實在太餓, 亦曾嘗試吃一兩口! 但雞實在太老太硬, 飯又多碎骨!最後連咀都弄損了, 亦不得不放棄!琴日, 我去搵個太子女, 重俾埋張相佢睇, 個太子女就即刻發爛渣, 話有咩證明啲嘢係佢!點知你張相响邊度搵番嚟!  於是我攞張相俾後面個客睇! 佢就即刻老羞成怒走去報警! 點知警察嚟到都叫佢俾番盒飯我, 不過佢就死都唔肯, 重話係因為上次佢個收銀將我張一百蚊換咗張五十蚊, 我次次嚟都講番哩件事! 佢覺得我都已經攞番啲錢, 唔應該重响度講, 所以佢今次點都唔會賠番盒飯俾我!哦! 太子女講得有理! 唔怪得之前啲外買牛腩重有血腥味! 啲茶飲完就痾! 今次重連啲咁嘅雞骨飯都照買俾人! 本人因貪方便及趕返工, 所以對其食物要求不高, 即使說不上是好, 有時更是非常差, 亦已光顧十年! 但現在已忍無可忍, 是時候說再見了!

大概兩年前，開始工作時間由5日半改為5日之後，好多時星期六瞓晏啲，晏食早餐，就自不然午餐時段都未肚餓，等下午茶時段先落去食慳番啲，所以就寫咗一系列「我的美孚下午茶餐」。

不過，近依一年都有所轉變，星期六都照正常早起番身，三餐都跟番正常時間，下午茶都少咗去食，只喺偶爾一次半次，今趟晌金龍泉食下午茶就喺其中一個「偶爾」。

一如一般茶記，金龍泉都有好多款下午茶餐選擇，輕盈啲嘅、湯麵類嘅、燒味類嘅、特色啲嘅……，而我哋兩公婆就揀咗個「飛碟三文治餐」同「紅豆冰套餐」，叫做食得豐富少少。

飛碟三文治餐分兩個價錢，視乎飛碟揀咩料，如火腿 / 餐肉 / 芝士 / 果占醬 / 鹹牛肉就賣$23，而揀吞拿魚 / 鮮牛肉就收$25，配沙律或薯條，如想雙拼加$4，包茶啡，照例凍飲、檸樂、檸蜜、特飲就要補錢。

我哋要咗鮮牛肉，又睇睇有幾新鮮。

兩件飛碟三文治，漲卜卜，熱烘烘，外皮有點脆，我自己屋企都有飛碟三文治機，喜歡外層搽啲牛油先烘，出效嘅效果會份外金黃香口，但明顯佢哋就無特別咁做。

然而，內裡填滿鮮牛肉，色澤仲喺帶少少粉嫩，咬落好軟滑，肉味不俗，有少少沙嗲香，認真不賴。

不過，啲沙律就喺茶記嘅傳統貨色，甘筍、薯仔加啲生菜絲，比起生果沙律會有出水問題極為保險。

配埋芳香嘅奶茶，奶滑茶香，幾時都喺晌茶記飲奶茶最好。

紅豆冰套餐一共有4個選擇：法蘭西多士$25、雞扒撈麵$29、珍寶腸及雞翼（配沙律或薯條）$27、熱狗（配沙律或薯條）$26。

睇相就知我哋要咗雞扒撈麵，麵條喺公仔麵，不過唔喺丁字牌，但質地煮得還可以，至少無過腍，但雞扒可真唔細，煎得蠻香，淋上洋蔥汁，都算惹味吖。

至於杯紅豆冰，有1/3杯紅豆，唔會成杯冰咁搵笨，紅豆夠腍又夠清甜，抵飲。

未晌美孚住嘅時候，都曾經晌度食過晚飯，但感覺麻麻。

難得今次所食嘅兩個下午茶餐又做得唔錯，雖然，兩個餐各有不足之處，如飛碟三文治嘅沙律較為普通，而雞扒撈麵若換上丁字牌，相信味道更佳，當然對茶記唔可以太多要求，始終要睇成本。

單以今次嘅質素及價錢，都值得比個笑佢。

快手快脚, 放工醫肚, 就來一個燒味餐 原來真是似模似樣, 果然打正旗號是名副其實點了叉燒加燒肉的組合, 指名要瘦一點, 本身沒期望廚子真會留意, 但結果真的來了碟很美很瘦賣相亦很好的燒味, 叉燒很瘦很滑很入味, 燒肉的皮很脆, 很薄的肥羔, 入味的肉, 很難得, 自己再配了麵, 不過不失, 份量剛好整體是不錯的呢

金龍泉餐廳餐單提供港式, 茶餐廳, 冰室等推介美食位於美孚區，餐廳座位數未知人均消費約$50以下，結賬可以用現金。

您對於美孚餐廳「金龍泉餐廳」有何 comment？

金龍泉餐廳餐廳詳細資料：

• 金龍泉餐廳地址:
  美孚美孚新邨第七期萬事達廣場地下N51舖
  Golden Spring restaurant, Shop N51, G/ F, Mount Sterling Mall, Mei Foo Sun Chuen Stage7, Mei Foo
• 金龍泉餐廳電話:  
• 金龍泉餐廳價錢: $50以下
• 分類: 港式, 茶餐廳, 冰室
• 座位: 未知
• 付款: 現金
• FB專頁: 金龍泉餐廳 Facebook

更多金龍泉餐廳相關資料:

• 金龍泉餐廳分店
• Youtube
• Facebook
• Twitter
• Google