泗益 赤柱

泗益 評價 相片

係冇得去旅行嘅時期，赤柱絕對係一個放假chill下嘅地方，赤柱出名好多連鎖店，但當中都有一啲小店值得一試。

今次去赤柱食既係萬惡之首西多士，西多士由細食到大，絕對係香港人既comfort food，係茶記下午茶既數一數二美食，但其實西多士最初係來自法國，用牛油煎香麵包，嚟到香港個時先變咗做油炸，而且變成茶記嘅名物。

呢個年代既西多士已經越黎越多口味，好似咖央西多士就係傳統馬來美食咖央同西多士既結合，香港唔算有好多地方可以食到。

而今次赤柱呢間小店，正正可以食到咖央西多士。

呢間泗益係赤柱一間50幾年老字號既街坊茶檔，牌檔檔主係赤柱原居民，茶檔吸引咗唔少唔係住赤柱嘅人慕名而來，小店藏身喺赤柱市場道迴旋處旁既寮屋群入面，周邊有赤柱市政大樓，門口隔離有一個生果檔，旁邊就係赤柱市集，食飽仲可以行吓。

小店茶檔內，西多奶茶咖啡粉麵基本上都有，最受歡迎嘅就係佢嘅主打咖央西多士，亦都成為赤柱嘅名物，營業時間好短，有時都要排隊，要食西多士要好有恆心先得。

我前後嚟過兩次，第一次係星期六嘅朝早，因為知道餐廳好早收所以12點就嚟到，嚟到先知原來星期六、日、紅日係冇西多士，因為個師傅放假，老闆娘同我講要平日先有，所以第二次我就星期五朝早再去。

西多士每朝11點就會開始有得供應，平時差唔多12點幾可能就會賣晒。

兩次嚟到餐廳都接近滿座，好彩嘅係兩次黎都唔使等位就有得坐，座位唔多，所以如果一個人嚟有機會要搭枱，兩次食完大概12點幾，已經見門口有人排緊隊。

餐廳係港式茶記懷舊格局，外型設計同六十年代既牌檔相約，係一個鐵皮屋，有綠色帳篷遮蓋，入面嘅枱櫈都好似街市嘅熟食中心咁，以紅綠色為主調，檔身內係煮食空間，後面係儲存空間，檔身嘅左右兩邊會見到堆起左黑白啖奶同金多植脂淡奶，中間嘅空位就係老細遞嘢食上枱比客人嘅地方，檔頂都有一個已經生鏽嘅金漆招牌。

用餐區就係牌檔既前面，地方唔算大，得四張枱，都係一啲摺枱同膠櫈。

餐廳因為冇冷氣，所以夏天佢會有少少熱，只會有幾把風扇，雖然環境唔理想，但依舊客如輪轉，無阻大家一試懷舊風味既心情。

特別一提既係其實呢個鋪位係有兩間餐廳，正門行入黎既就係泗益，而後面個間係民益，民益係食中式粉麵同車仔麵為主，同大家慕名而黎食西多士既泗益係兩間唔同既餐廳，枱櫈唔係共用，如果一心想食西多士記得唔好行過龍，避免尷尬。

Menu得一頁紙，都係提供一啲茶鐺大排檔嘅常見嘢食，當中最熱門嘅一定係西多士，觀察周圍嘅食客，應該只有山長水遠嚟赤柱嘅人先會食西多士，赤柱嘅街坊反而只會叫一般嘅豬扒麵、沙嗲牛肉麵等等。

1️⃣ 咖央西多士 💰30（👅: 9/10）咖央西多士落單等咗10分鐘終於上菜，西多士外表炸到金黃色，新鮮整出嚟所以熱辣辣，聞到啲香味，西多士會切成六塊，外表睇落偏圓，同出邊四四方方嘅西多士唔同，個樣係不規則，西多士係幾厚身，而且脹卜卜。

呢個西多士同出邊嘅做法有啲唔同，師傅首先會將蛋白同蛋黃分開，然後將蛋白人手高速發打打到起泡，挺身之後先會將啲蛋黃落去溝埋一齊，再沾滿兩片本身已經搽左自家製咖咉醬既白麵包羅去用高溫油炸，所以呢度嘅西多士口感同出邊係完全唔同。

西多士最特別就係佢咬落非常軟綿，非常鬆軟，綿到好似棉花糖同疏乎厘一樣咁，完全唔覺得自己係食緊麵包咁，軟綿程度係我食過咁多個西多士最軟綿既一間，冇一間西多士可以媲美到呢一間，麵包同咖央外層已經融為一體，麵包食落偏濕潤，而西多士嘅外層咬落會有少少脆口，呢個特別嘅口感絕對係佢嘅賣點。

西多士入口係非常之重蛋味，蛋味重到係我食過咁多間西多士最重嘅幾間之一，同上環瑞記咖啡既西多士差唔多，唔多唔小係因為用既係土雞蛋，土雞蛋同雞蛋外觀睇落唔大分別，但超濃既蛋香味確實令人留下深刻印象，而且可以見到小店上面有裝滿雞蛋既籃。

而西多士上面有兩塊大牛油，牛油好快就融左，帶有少少鹹香，令到蛋香味更出。

呢度西多士標榜唔使落糖漿，即使西多士唔放糖漿或者煉奶其實都夠甜，因為入邊嘅咖央味好突出，咖央醬主要用砂糖、椰奶同椰汁製成，所以食到小小椰香，而且已經夠甜，淨係普通牛油已經同西多士好夾，整體食落唔會太甜，入面嘅咖央醬都唔會話搶咗啲蛋味，咖央醬香甜可口，甜味同蛋香相輔相成，甜度同各方面嘅味道都平衡得幾好。

西多士要挑剔嘅就係佢食落比較油膩，因為佢個西多士都佈滿左油，會有少少油溢味，略嫌西多外層可以再脆啲。

要總結依個西多士就係，如果你鍾意食超鬆軟嘅西多士，或者你鍾意食蛋味好重嘅西多士，咁呢一間非常適合你。

2️⃣ 咖央多士 💰13（👅: 7.5/10）呢一個咖央多士係我星期六第一次去嗰時冇西多士而叫嘅多士，佢就係烘左嘅多士不過搽咗咖央醬。

多士等咗唔使10分鐘就上枱，多士食落夠脆，入面有咖央醬，嫌牛油味唔夠，同埋西多士相比下無咁出色，因為無左西多士既超鬆軟口感同蛋香味。

3️⃣ 凍奶茶 💰17（👅: 8/10）奶茶係用絲襪泡製，飲落好香好濃滑，即使係凍奶茶但都會飲到茶底帶落嘅小小苦澀味，但飲到嗰一刻同時就會俾佢嘅奶中和左，茶味會比奶味重一啲，整杯奶茶飲落夠甜，飲到最後茶味唔會話減淡，可見茶味有幾濃郁。

略嫌可以再滑啲，但夏天飲到夠凍唔苦既奶茶，已經係涼透心，一大樂事也。

🌟味道來講，佢嘅咖央西多士係幾出色，但星期六、日同紅日食唔到，如果要平日特登放假去食呢個我覺得就未必值得，除非本身想去赤柱放假，咁順路就好值得一試。

價錢來講係非常合理，份量充足，雖然赤柱算係遊客區，但野食都唔會定價定到好進取，反而係主要做街坊生意。

餐廳入邊得老細兩公婆，落單完全唔使寫低非常好記性，但因為得兩個人人手可能唔係話好充足，唔會好得閒咁特登行過黎同你落單，反而可能要佢經過時舉手，或者特登行去近門口既老闆娘度落單。

佢地主要做街坊生意，見佢地同一啲赤柱街坊有傾有講，我係第一次嚟，唔知幾時有西多士所以第一次幫襯完有特登問老闆娘，佢都好有耐性解釋，唔會係澳牛串串貢語氣，老闆唔會因為人潮洶湧而黑面。

第二次黎呢度係自己一個嚟，食食吓有個食客搭枱，佢見我係咁用手機同相機影相，就問我係唔係foodie，見佢同老闆娘輕描淡寫咁落單，應該係赤柱居民，傾咗幾句佢祝我成功，食完碗麵就走咗。

係唔係個個赤柱居民都咁熱情，定係因為係呢個有人情味嘅小店食野，大家都稍為放低社交距離？係呢個食野偏貴、連鎖店同外國西方餐廳林立既赤柱，泗益就好似一間清泉，一間好似格格不入既大排檔，定價親民，而且唔係食外國菜，而係香港本土既味道，係香港人既人情味。

食下西多士、感受香港市集文化、去海邊吹風，係香港慢活既好方式。

👅味道: 8.5/10🍴環境: 6.5/10💰消費: $47 (服務費: NA)

之前朋友同大食妹介紹泗益, 話呢度有香港排名第一嘅西多士大食妹一聽到呢個名銜, 決定趁三日連假, 搵日去試吓可惜去到嘅時候, 職員話假日唔做西多士, 經典嘅菠蘿包都已經售罄<豬扒蛋治>難得嚟到呢度, 點都要食啲嘢, 大食妹就嗌咗份豬扒蛋治本身以為係普通野, 點知一試難忘, 有大食妹細個時候食到嘅味道豬扒蛋治嘅麵包非常鬆軟, 雞蛋炒得好香, 配搭稍為結實嘅豬扒, 超級好食<沙嗲牛治>朋友嘅沙嗲牛治沙嗲牛餡料略嫌有啲乾, 比起沙嗲牛, 口感更似牛肉乾<凍咖啡>凍咖啡記住記住記住一定要嗌少甜, 少甜已經超級甜, 糖水feel

_____好味指數：🌟🌟🌟🌟抵食指數：🤑🤑🤑千里迢迢嚟到赤柱就係為咗食呢間嘅西多士。

呢間老字號喺香港好出名，成日都排晒隊，同埋又早閂門，所以食到都係一個運氣✅西多士外層炸到金黃香脆，質感相當鬆軟，蛋味濃郁，中間就搽滿咗香甜軟滑嘅咖央醬，再配埋香甜嘅糖漿同芳香嘅牛油一齊食，非常好味✅凍奶茶西多士配凍奶茶真係非常搭配，奶茶係用絲襪炮製，飲落好香好濃滑，同時飲到茶底嘅少少苦澀味。

重點係夠晒冰涼，大熱天飲超級消暑

平日早上去，感覺非常不好，幾次被大聲呼喝。

點了西多士及咖映多士，老闆娘不耐煩地指住牆上面一張小小的圖片，説「你哋睇清楚先出聲好唔好？這上面寫得很清楚已經賣晒！西多士賣哂、咖映多賣哂！你哋睇唔到咩？仲 order????」真係要好受得氣先好幫襯。

😂本身食肆環境差及附近的臭氣已算了，一早預咗。

但其實食物幾好食都係假。

赤柱話哂係遊客區，咁嘅服務態度真係好影響遊客對香港及香港人的感覺。

希望老闆娘可以注意一下。

✨咖央西多士口感鬆軟 帶空氣感咖央醬唔太甜 甜度適中✨奶茶茶味濃 幾香滑 頗甜 無得揀甜度 因為上枱前已落糖食物可以 但又未至於好食到必食環境一般 就算有吉枱都要迫人搭枱服務態度一如以往既差 想食可能要受氣先喺呢度如果你係生客係唔會有人理你 首先會呼喝你 叫你搵到位先講之後叫極都冇人落單 然後用呼喝嘅態度幫你落單 當我地叫西多士時候佢態度就仲差話整西多好麻煩乜乜乜其實我地都起碼有八九年冇幫襯佢去完發現呢度除咗價錢 其他野十幾年都冇變過 真心唔明 其實覺得咁麻煩你咪唔好做囉 又要做又要賺錢又要嘈 咁好咩

泗益餐單提供港式, 茶餐廳, 冰室, 大牌檔等推介美食位於赤柱區，餐廳座位數40人均消費約$50以下，結賬可以用現金，Booking訂位可以電話致電 28130507 查詢。

您對於赤柱餐廳「泗益」有何 comment？

泗益餐廳詳細資料：

• 泗益地址:
  赤柱市場道2號
  泗益, 2 Stanley Market St, Stanley
• 泗益電話: 28130507
• 泗益價錢: $50以下
• 分類: 港式, 茶餐廳, 冰室, 大牌檔
• 座位: 40
• 付款: 現金
• FB專頁: 泗益 Facebook

更多泗益相關資料:

• 泗益分店
• Youtube
• Facebook
• Twitter
• Google