金寶冰廳 新蒲崗

金寶冰廳 評價 相片

之前聽同事介紹呢間新蒲崗良心懷舊港式茶餐廳，話佢啲奶茶同埋沙嗲牛好正，就一直都想試吓，於是趁放假今日特登慕名而來到新蒲崗懲罰一下佢😛.就咁睇個店面就知道佢歷史悠久，好彩我都事先都上網做咗啲功課，原來佢係70年代已經開咗，真正係一間懷舊老字號嘅港式茶餐廳，而且係三代同堂嘅家族生意，第一代老闆已經係90幾歲高齡嘅爺爺👴🏼而且之前曾經俾人貼街招屈過佢係藍冇良心，後來經一班孫仔澄清返原來係有良知嘅良心店💛.除咗格局懷舊經典，食物都係典型港式茶記可以食到嘅，我見價錢都好合理同抵食，我叫咗個全日特餐$38， 有沙嗲牛肉麵，火腿奄列，牛油方包，我仲叫咗杯嘅金寶熱奶茶☕️某程度上我都係為呢杯熱奶茶同佢嘅沙嗲牛肉麵冒名而來。

.我見網上啲人話佢嘅菠蘿油都好正，本身我諗住另外加多一個菠蘿油我嘅食量當然食到啦，但係個侍應哥哥超好人，佢話幫我將個牛油方包轉做菠蘿包加多$5加舊牛油就得，咁樣埋單都係$43抵d，就唔使我另外買多個菠蘿油加$13咁貴，仲幫我諗埋會唔會太窩心？！☺️另外我想講佢無論係侍應定係幫我執碗嘅姐姐，禮貌都超好，唔該前唔該後，又叫我慢慢食，真係好耐冇感受到啲傳統嘅茶記都有咁好嘅服務態度👍，講堅，服務態度良好對我的用餐過程來講好重要，真心加分！💛.講返佢杯奶茶，我首先冇加任何嘅糖試咗一啖，一入先係好香滑奶味，茶味唔算好濃，亦唔會有一種苦澀味，但係慢慢茶味開始滲出同響口腔入面回甘，跟住我加咗一茶匙嘅糖，加咗糖之後再飲即刻帶出個奶茶味😍就係呢一隻典型港式茶餐廳奶茶嘅味道！🥰香滑嘅奶味有加少少甜味仲有茶味每樣味道都好平均啱啱好！佢杯熱奶茶真係好好飲🥰.繼而就試佢嘅沙嗲牛肉公仔麵🍜睇返網上資料原來老闆每日堅持新鮮手炒，賣完即止，我見到網上嘅相有啲洋蔥係牛肉入面一齊炒，我今次呢碗就冇可能咁啱冇撈到，不過佢呢度嘅食物份量都幾大份，你見到佢嗰啲沙嗲牛肉都幾多，出手好闊綽，每一片都完整而且幾大片，唔會碎濕濕，而且口感好嫩有咬口，又唔會太腍同埋梅👍沙嗲汁嘅味道又係啱啱好，加上佢又係用大光麵，兒時嘅味道同回憶返晒黎！😋👍.火腿奄列煎得比較熟同埋乾身，似火腿煎蛋多啲🤣而且啲鹽有唔平均嘅情況，所以少少偏鹹，不過撈埋落去同個沙嗲牛肉麵一齊食又幾夾喎！.食完個沙嗲牛肉麵同埋火腿奄列其實已經好滿足，但係食埋個菠蘿油俾我埋尾就更加滿足啦，雖然好邪惡但係都一定要試！因唔係遇上佢嘅菠蘿包新鮮出爐嘅時間，所以菠蘿包未能用本身嘅溫度將格牛油溶化，但係一咬落去果下真係soft好香！本身菠蘿包已經好鬆軟啦，加上中間嗰格咸牛油又香又咸又甜又滑又creamy多重嘅滋味, 係好邪惡但係真係好好味!!😍可能我太耐冇食過菠蘿油，食返真係有一種莫名嘅感動🥲.好開心今日可以去一間咁懷舊又高質嘅茶記重新體會返香港茶記文化，我發覺原來我都好耐冇認認真真坐低食返一啲地道嘅茶餐廳食物，當食返一啲正宗又好味嘅茶記食物真係會莫名地感動和滿足😍🥲。

有啲嘢明明由細食到大，但係隨着年紀越大見識越多，慢慢將佢哋遺忘咗，有時可能最好嘅嘢就響身邊，但偏偏冇好好去珍惜，好感激仍然有人繼續保留同埋捍衛呢種香港特色嘅美食同文化，真心希望屬於我們香港嘅文化同埋特色可以繼續得以承傳🙏🏻.店名：金寶冰廳💛地址：新蒲崗康強街53號地下

有一日look facebook係奶茶關注組發現👀原來新蒲崗有間茶餐廳既神秘memu，有阿華田/好立克奶茶，作為奶茶控既我即刻放假去朝聖！店舖睇落係間普通既茶記，Memu上都冇阿華田／好立克奶茶既選項，但係落單同伙記order 佢地就識做嫁啦🤣🤣(果然係神秘Memu，知訂先有得叫😋) 我地order左個常餐沙嗲牛肉麵，有麵包煎蛋煎腸跟餐，仲有個西炒飯！當然仲有2位主角 阿華田奶茶&好立克奶茶啦～沙嗲牛肉麵高出正常水平發揮，沙嗲汁非常濃郁，麵基本係公仔麵水平，牛肉唔韌撈埋d沙嗲汁食，食到男朋友舔舔脷😋麵包口感軟熟，普通麵包冇乜特別！煎腸煎蛋偏咸，夾落麵包到食岩岩好😋中和左d咸麵 又可以昇華個麵包既味道👍沙嗲牛肉麵餐值得推薦！👍👍👍👍👍西炒飯炒得太濕 唔夠乾身粒粒分明，但係味道唔錯，係唔酸帶甜既味道！可惜既係得火腿片冇腸仔粒😫蛋絲普通唔太特出蛋味！整體上個西炒飯普通！推薦指數👍👍最後既主角黎到啦😋😋阿華田奶茶＆好立克奶茶既感覺好特別😋好似飲緊阿華田咁，但係口腔又傳出陣陣既茶香味😋兩者非常配合，而且阿華田同好立克本身都有甜味，奶茶唔駛額外加糖都已經好好味道啦😋👍不枉我遠道而來!極力推薦👍👍👍👍👍 金寶冰廳既伙記好有禮貌，座位都坐得好舒服!下次黎開新蒲崗都要幫襯下哩個特別奶茶先!推薦👍👍👍👍👍

以前既冰室/ 冰廳其實係唔會賣主食多數只係提供凍飲啦雪糕同冰類等等既冷凍食品香港既冰室以前係拎小食牌, 都係會得飲品三文治同西餅蛋糕咁同而家既茶餐廳絕對係兩樣野黎不過時移世易而家既冰室/ 冰廳已經同茶餐廳無咩分別都會提供小菜粉麵等等等等仲保留到真係咁懷舊裝修既冰室其實唔多收銀係伯伯黎 =)呢度奶茶好飲，有茶味之餘仲係好香滑茶味唔會比花奶搶左去不過沙嗲牛肉麵就一般唔算太特別聽人講佢既菠蘿油都係好好食下次就再黎嘆下先~~

金寶冰廳嘅奶茶喺區內非常出名，從佢哋將杯奶茶以舖頭名命名，就知道對呢杯自家出品有幾大信心。

一場嚟到，主要係想試下杯金寶奶茶，食咩其實冇乜所謂，於是貪方便叫個下午茶餐，揀咗我嘅 comfort food 沙嗲牛肉麵，配餐肉炒蛋同牛油麵包。

食物正常普普通通，唔特別介紹，至於杯奶茶呢，單睇面頭塊奶膜就知有啲料到，證明茶膽撞落淡奶時，熱力同勁道十足，因而分離出一層奶脂，凍咗就形成奶膜。

呷一口，奶茶非常厚身，奶味亦好濃，相對地茶味就冇咁強，所以雖然水準高，但係並非我最喜歡嘅味道，不過如果鍾意飲奶嘅話，呢杯金寶奶茶肯定係你嘅心頭好。

金利多人又逼，所以3月頭開始試呢個冰廳，只食過早餐，試過沙爹牛麵，及雪菜麵，有人大讚沙爹牛麵，試過d牛肉係好軟腍既，不過自己本身不太好沙爹，所以唔覺得有咩特別，反而覺得佢d雪菜幾好食，有炒香既味道，炒蛋係即炒既，至於奶茶，我一向覺得茶餐廳d奶茶放耐左會變酸，但呢間好似無，但都係覺得無咩特別。

環境方面，燈光唔算光猛但感覺算係干淨，唔似前面個間金利，一入去有種污糟既感覺。

匙羹叉用牛油紙包住，心理上會覺得干淨d，唔使怕個個都摸過晒。

服務方面，通常落單既都係個位太子(佢應該係收銀伯伯個仔？) 佢例牌木口本面，不過茶餐廳服務我都無咩期望了，態度唔太差都接受了。

不過最令我頂唔順既係門口收銀既伯伯唔帶口罩(呃..正確應該係口罩係下巴度，但咁同無帶有咩分別) ，仲要係咁咳。

厨房師傅又係唔帶口罩係度大大聲吹水，OK，眼不見為干淨，不過現在疫情下，我不能再接受了，所以唔會再去。

金寶冰廳餐單提供港式, 茶餐廳, 冰室等推介美食位於新蒲崗區，餐廳座位數未知人均消費約$50以下，結賬可以用AlipayHK,支付寶,現金，Booking訂位可以電話致電 23207684 查詢。

您對於新蒲崗餐廳「金寶冰廳」有何 comment？

金寶冰廳餐廳詳細資料：

• 金寶冰廳地址:
  新蒲崗康強街53號地下
  金寶冰廳, G/ F,53 Hong Keung Street, San Po Kong
• 金寶冰廳電話: 23207684
• 金寶冰廳價錢: $50以下
• 分類: 港式, 茶餐廳, 冰室
• 座位: 未知
• 付款: AlipayHK,支付寶,現金
• FB專頁: 金寶冰廳 Facebook

更多金寶冰廳相關資料:

• 金寶冰廳分店
• Youtube
• Facebook
• Twitter
• Google