MARKAHOUSE 荃灣

MARKAHOUSE 評價 相片

今日收工帶左呀媽黎試新野，因為之前行donki經過見到如心廣場二期有唔少新餐廳，所以今日就黎左食飯。

呢間西餐廳裝修簡潔得黎又好多detail位，感覺係幾用心佈置。

而且佢比較特別，似係特登間出黎既鋪位，成間都係落地玻璃，見佢幾雅緻咁就入左去試～食物選擇唔算多，不過都有齊飯，意粉，豬，牛，羊，雞，都算係咁，而且鐘意既話仲可以叫紅白酒飲～點完餐無耐就上左餐湯同沙律，野菌忌廉湯好濃郁，好多菇既粒粒，我好鐘意！沙律新鮮，正常發揮，醬汁撈得好均勻哈哈。

香煎蟹餅有6粒，切開一半會見到一絲絲既蟹肉絲，煎得好香口同鬆軟。

不過調味稍濃，唔太食得出蟹肉既鮮甜。

跟住係我媽最愛既黑松露野菌意大利飯，黑松露除左有撈入飯入面之外，面頭仲有少少黑松露，真係好香！而且意大利飯好creamy，加上菇類同芝士，簡直係絕配～然後我地仲叫左一份西班牙伊比利亞黑毛豬鞍，豬鞍口感紮實，有少少肥肉痴住同埋近骨既部份最為香口。

調味無過濃，可以食到豬肉香味。

粗薯條新鮮炸起，唔油又夠香口。

愛酒既呀媽加左兩杯酒同我一齊飲之餘，佢自己飲完仲再追加左一杯。

。

犀利犀利哈哈。

又到一年一度生日既時節，男朋友帶左我黎食係如心廣場既Marka House。

就係DonkiDonki or Aeon過一條天橋渣，好易揾！依間餐廳之前係屯門紅橋，係跑馬地高級餐廳既主廚開，口碑甚佳，好受屯門友歡迎，本來都諗住同同事放工去試試，但佢早一排宣布搬去荃灣，咁唯有出番城試下！Marka House成間玻璃屋咁，係外邊已經睇到成間鋪既氛圍，就係grand。

裡面以黑、白、灰色做主調，地面同枱面都係雲石面，雖然顏色暗沉，但裡面燈光足夠，比人種好grand，好乾淨既感覺。

門口有餐牌，大家可以係門口睇下食乜。

入到去，發覺職員都有帶口罩，保持良好衛生，而且他們不會玩手機，唔會有玩玩下手機掂食物既問題，十分欣賞。

他們見到客人就隨時standby提供service，故此一去到就確認booking，及介紹QR code點餐。

我們點了香烤自家手製蟹餅(6件)($63)、紅酒紅頰肉意大利飯($108)、 西班牙伊比利亞黑毛豬鞍(2件)配香脆薯條($218)及紅酒白酒各一杯($38 each)首先先黎左兩杯酒先，可以慢慢飲，傾住計等食物。

依度既環境幾Chill，好Grand既陳設，加上好舒適既音樂同燈光，而且店員安排位置，都會首先安排客人保持距離，之後多些客人先會Fill up，等客人都坐得舒服些，傾計都開心點。

等左一陣，先黎左小食蟹餅。

蟹餅烤得金黃，旁邊配上黑醋、沙律醬、蟹子做Dressing。

而且佢個Dressing都放得好Decent。

蟹餅好足料，口感好扎實，啖啖都係蟹肉，而且好香。

配埋Dressing可以refresh下，中和下油膩感。

食完無耐就黎左個Risotto。

都幾大碟，聞落去有好香濃既忌廉味同紅酒汁既味。

牛助條比例都多，好淋之餘又好有牛味，食落好似燒烤過咁，配埋紅酒汁簡直係絕配。

非常好食最後黎左伊比利亞黑毛豬鞍，絕對係驚喜之作，非常出色。

豬鞍用左好簡單既Seasoning，原汁原味。

且煎得唔會過熟，岩岩好，切開時還有少少粉紅色，肉粉紅色代表豬肉新鮮。

一咬落去肉汁好Juicy，但口感好爽脆，唔會韌。

配埋醬汁，每一啖都好滋味。

另外，佢既薯條配菜都好好食，外脆內軟得黎好乾身，高溫即炸後逼番油出來，不會油淋淋，正!總結，這餐廳由裝潢到服務到食物級數也很高級，可以坐低慢慢傾計，但價錢也相宜(埋單$511)，性價比高。

能夠在生日時享受如此高質既晚餐，絕對是享受。

來到如心廣場二期，被這間玻璃小屋西餐廳＜Marka House＞吸引住，停下了腳步，見門口Menu 上既set dinner 好吸引，而且價錢合理，就同朋友入去試下。

餐廳格調感覺優雅，環境舒適，是晚雖然客人不少，不過座位算是闊落，坐得舒服。

<香烤自家手製蟹餅>自家製香烤蟹餅烤得金金黃黃，但完全不覺得油膩同熱氣，而且每件都烤得好精緻，剛好一口一啖，配埋沙津醬，非常好食。

烤蟹餅入面係滿滿既蟹肉絲，用料好足，入口啖啖都係蟹肉。

<美國極佳級安格斯肉眼扒>一上枱已見到牛扒份量不少，配埋即炸粗身薯條，賣相非常吸引。

牛扒煎至五成熟，出來效果非常好，牛扒本身質素不錯，肉質夠嫰，亦冇乜根同揸，咬落去夠淋同好多肉什，夠曬juicy 同有牛味。

質素高既牛扒，真係不用太多調味，輕煎已經好好食。

即炸粗身薯條夠曬脆口，配牛扒一流。

<香草蕃茄鱈魚意大利麵>鱈魚柳足足成寸厚，食落去啖啖魚肉，魚肉質素不錯，夠滑吾鞋口。

特別係濃郁既蕃茄汁配濶身意大利麵，個汁好濃好creamy, 完全吾酸，非常好味。

另外還order左餐廳既house wine,配牛扒同海鮮係吾錯既選擇。

如果吾鐘意飲酒既，亦有菠蘿冰紅茶可以選擇。

晚餐都有好多選擇，價錢亦非常親民。

餐廳食物質素高，上菜快，服務不錯，＜Marka House＞,我一定會再來呀！~

今晚唔洗OT，放工決定又再去荃灣 explore下，事關上次行Donki個陣經過如心二期商場新裝修完靚左好多😍對上個次去如心仲係包到實一實，咁耐冇黎，而加簡直係煥然一新🤩除左個shopping mall靚左好多之後，呢到仲有好多餐廳，行左一圈之後，就俾呢間係轉角位好似玻璃屋嘅餐廳吸引住🥰望入去d擺設同格局都好有質感，起初以為咁好格調嘅餐廳會好貴，但望下門口既Menu 價錢又好合理喎！ 所以就決定試下啦🤣太耐冇出城，難得出黎食飯，order 左2杯house wine chill 下🍷 Rośe and White Wine (跟餐 +$38)性價比好高，加少少錢有杯有質素嘅酒飲，真心可以一試，除左白酒，仲有紅酒可以揀！個人覺得house white wine 個味幾特別，fresh得黎唔會太酸，屬於易入口系列👍泰式酸辣煙三文魚🌶 呢個係店員哥哥推介嘅Fusion野，賣相同味道都好似泰式生蝦，酸酸地同微微辣，好開胃😋菠菜忌廉雞肉火腿意粉🍝首先要讚嘅係用料方面，食得出係用靚料，意粉係扁身pasta，彈牙得黎有蛋香，面頭個片似係cc super 買到d貴價Parma ham 🥰甘香得黎唔會太咸！最欣賞佢意粉入面d雞肉，好嫩滑好好食 🍗 西班牙黑毛豬鞍配薯條豬鞍表面煎到好脆，切開個陣已經feel到佢個脆脆嘅程度🤩因為係黑毛豬，所以油分充足，肉質好juicy!🍟薯條係厚實，係🥔原個薯仔切條，所以脆得黎薯味好濃，perfect 😋最後想講嘅係，呢度冇實體Menu，落order係用QR code， scan下個QR code就已經見到Menu同可以即刻落order， 好方便亦都好新穎🤩 連d餐具都好靚🥰🥰 因為我哋係兩個人share黎食，店員好細心咁俾左2隻碟我地☺️下次再黎試埋個cream brûlée 🥳🍮

之前老公上網見到呢間喺屯門好出名嘅餐廳搬咗嚟荃灣好似個老闆本身係酒店厨師？所以呢晚我哋就嚟試吓先我哋8點幾先到所以客人不算太多成個店面望落好闊落裝修簡約餐牌就咁望選擇唔算多不過食落就會明貴精不貴多嘅道理呢度最出名係食pasta我同老公一個叫咗煙腩片芝士蛋香意大利麵一個叫咗黑松露野菌意大利飯加錢(好似加38蚊？)仲有個湯同沙律呢個沙律好夠醬同意大利黑醋一啲都唔孤寒係多汁嘅情況下連平時麻麻地呢啲沙律嘅老公都話好好食😂個南瓜湯我就略嫌甜咗少少自己加返啲鹽同黑椒就好啱味了濃稠度剛好主菜應該係即叫即整所以都等咗15至20分鐘不過呢啲等侯時間係值得㗎☺️呢個意大利飯一擺上枱真係香到不得了！黑松露香氣湧住埋嚟個汁食落去非常濃味成個risotto口感又唔會一pat嘢黏口得嚟又有少少飯粒嘅咬口我食到爭小小唔想留一半俾老公😂不過老公話佢個意粉都好出色所以我哋就交換嚟食了呢個意粉聞落無個意大利飯香得咁誇張但都有好迷人嘅芝士香氣同風乾火腿肉香🤤食一啖落口個汁好cream好滑呀！意粉嘅口感係剛剛好！師傅煮意粉嘅時間真係拿捏得剛剛好！如果你同我一樣非常喜歡creamy又有咬口嘅食物呢度嘅risotto同pasta真係無得輸！至於份量方面佢唔會話少得好誇張但亦唔係太大碟頭一般女仔飲完個湯食咗沙律甚至會有食唔晒嘅可能不過我嘅食量係相當於一名成年男子的🤣所以佢嘅份量對我嚟講只是剛好同埋真係太好食有意猶未盡嘅感覺🥰另外食飯期間有個小趣聞:隔離枱應該係熟客一家四口同個厨師傾偈其中目測大約4至5歲嘅仔仔突然大叫“叔叔你啲嘢食真係好好食呀！”童言無忌我嗰刻都好想嗌返過去“我都覺呀！”😂

MARKAHOUSE餐單提供西式, 漢堡包, All, Day, Breakfast等推介美食位於荃灣區，餐廳座位數未知人均消費約$101-200，結賬可以用Visa,Master,現金,銀聯，Booking訂位可以電話致電 26981111 查詢。

您對於荃灣餐廳「MARKAHOUSE」有何 comment？

MARKAHOUSE餐廳詳細資料：

• MARKAHOUSE地址:
  荃灣大河道98號如心廣場商場二期1樓119號舖
  MARKAHOUSE, Shop119,1/ F, Nina Mall2,98 Tai Ho Road, Tsuen Wan
• MARKAHOUSE電話: 26981111
• MARKAHOUSE價錢: $101-200
• 分類: 西式, 漢堡包, All, Day, Breakfast
• 座位: 未知
• 付款: Visa,Master,現金,銀聯
• FB專頁: MARKAHOUSE Facebook

更多MARKAHOUSE相關資料:

• MARKAHOUSE分店
• Youtube
• Facebook
• Twitter
• Google