大歡戈 灣仔

大歡戈 評價 相片

見新開一排都冇食過，店面光鮮乾淨，22蚊早餐有個餐飲蕃茄湯通粉加杯咖啡，外賣加兩蚊好平但好難食，個湯好淡，冇咩蕃茄味，入面啲粟米又好硬，好似冇煮過咁，啲通粉質感差，一咬又散又難食，得個餐肉咪就係餐肉正常味，我要左即磨咖啡，正常野，但唔會有下次...原本見佢有豆漿任飲好似好開心咁同埋程序好亂，廚房入面既人好似唔知自己要做咩咁...行黎行去但又唔係出餐，收銀ok, 出餐有啲慢，都有禮貌...但如果一樣都係蕃茄湯底既通粉...我揀香港地算😭

成個餐廳用自助形式點餐取餐，今次黎我就嗌左個套餐B($20) 有杯汽水可以自助任斟，有隻雞脾，有4條台灣腸，另外我加左咖哩魚蛋($8)老實講係算係平，但食物d質素就真係好差..台灣腸比起出面街邊貨細條，味道一般。

魚蛋彈都唔彈下質地似魚腐多過魚蛋，成粒得麵粉完全食唔到魚味，咖喱亦無咖哩味。

至於隻脾，用黎炸雞脾d油唔知係咪用左好耐定炸過其他野，搞到隻脾d味道好奇怪。

雖然平，但今日公眾假期門市都大把位淨...聽聞呢間係海底撈集團，估唔到原來d野食質素咁麻麻麻麻..不過d講大陸話既服務員妹妹都幾好態度，算係咁

行經灣仔諗住食個麵之後去剪頭髮，見到有間新開嘅快餐店就走去望下個水牌有咩食啦，嘩！😳😳個價錢真係嚇一跳，回到20年前，全部快餐飯類都唔超過30蚊，見佢咁嘅價錢咪膽粗粗入佢試下囉，叫咗個咖哩雞髀飯都只係24蚊加埋杯嘢飲5蚊總數都只不過係 $29 都唔過 30，另外嘢飲白飯重要係任裝添喎。

可能我大鄉里未見過，佢有個自助白飯機，可以揀 200 g 或者 300 g 嘅飯量，唔夠嘅可以再添…… 講番個主餐咖哩雞髀飯，其實冇乜太大特別，咖喱汁唔係太有咖哩味，炸雞髀一般茶記貨色，整體嚟講今時今日物價高賬嘅年代要咁嘅性價比其實冇乜太大要求，心諗應該只有大財團先有咁嘅財力去以本傷人，睇返原來佢背後嘅集團就係海底撈火煱同一個老細……

灣仔呢排開咗間新嘅快餐店，見到又有小食，有主餐同埋有甜品，所以今日就嚟試下。

入到去，見到好多人都見新開張入嚟幫襯，不乏學生同打工仔。

見佢嘅價錢唔算太貴，而我今日就嗌咗個32蚊嘅海鮮飯同一個20蚊嘅千層蛋糕，不過就唔包嘢飲，要加五蚊先有得任飲汽水，但係由於係外賣嘅關係，所以要加多兩蚊，呢樣嘢我就覺得有啲唔係咁貼心。

但佢哋送餐嘅速度真係好快，我大概都係落咗單兩至三分鐘就已經即刻有齊曬所有嘅嘢。

先講個海鮮飯，飯係用炒飯底，但我認為唔算太香，佢嘅海鮮比較細粒同埋唔算太新鮮，白汁方面我覺得唔算太濃味。

失望之際，食咗佢哋嘅千層蛋糕，反而令我有新驚喜。

佢嘅千層蛋糕係有芒果肉喺其中一層，所以食落去唔會覺得好肥膩，而且都好有果香味，呢個可以下次再試。

因為呢個千層蛋糕我決定畀一個好評佢。

大歡戈餐單提供港式, 茶餐廳, 冰室等推介美食位於灣仔區，餐廳座位數45人均消費約$50以下，結賬可以用AlipayHK,支付寶,現金,八達通,微信支付，Booking訂位可以電話致電 23836003 查詢。

您對於灣仔餐廳「大歡戈」有何 comment？

大歡戈餐廳詳細資料：

• 大歡戈地址:
  灣仔灣仔道165-171號樂基中心地下A1號舖
  DAAI FUN GWO, Shop A1, G/ F, Lucky Centre,165-171 Wan Chai Road, Wan Chai
• 大歡戈電話: 23836003
• 大歡戈價錢: $50以下
• 分類: 港式, 茶餐廳, 冰室
• 座位: 45
• 付款: AlipayHK,支付寶,現金,八達通,微信支付
• FB專頁: 大歡戈 Facebook

更多大歡戈相關資料:

• 大歡戈分店
• Youtube
• Facebook
• Twitter
• Google