喜喜燒臘茶餐廳 灣仔

喜喜燒臘茶餐廳 評價 相片

今晚飲左唔少，醉就梗嘅，醉左肚餓要醫肚，天經地義。

想去永華食麵，但夜晚一點幾已經收左工，就去翻曾經所愛嘅食肆喜喜度食碗雲呑麵，睇下質素有冇翻生！唔食燒味，就食喺度點左食過唔錯嘅雲呑麵，評雲呑麵永遠分三個部份，麵、湯及雲呑。

雲呑麵 HK$32賣相唔正宗，雲吞冇擺底規扥起麵身。

麵麵爽口，有硯味而不重，份量比正宗雲呑麵大碗，算唔錯。

湯甜，好有蝦皮味，亦有豬骨及大地魚味，但飲完幾口乾，味精唔少。

雲呑最好，豬肉少於一成，有大地魚粉，蝦爽口而有蝦味，啤水時間掌握得好好。

總結: 整體而言碗麵算做幾好，二十四小時營業方便食客，好適合我呢類夜晚飲到啤啤夫嘅酒鬼。

雪耳豬骨湯，是日例湯，味道唔差架喎，只係外賣唔夠熱囉。

舊雪耳有成個碗咁大呀，真誇張！雞鵝飯加咸蛋，原本係切雞髀燒鵝髀飯加咸蛋架麻，叔叔話要過百蚊，咁貴？！公司比錢點肯過我﹗依家仲要比骨杉杉無肉食雞翼我，陰功 ﹗好采味道質地都好滿意。

鵝肉味道香濃，肉質細嫩多汁，唔錯唔錯。

咸蛋高質，出晒黃油，撈飯無得頂！我叫左 8 個飯其中 4 個都有雞，點解全部都係雞翼呢？乾鞋口感又味道平平，no good！如果唔係再興燒臘休息都唔會走過黎喜喜買飯，再興平靚正又好食，雙髀飯七十蚊有找架 ﹗每年只有兩三次黎灣仔會展攞 show，其中可能只有一次能夠去再興買燒味飯食，但居然星期日休息呀 ﹗我仲長途跋涉行到身水身汗，點知買唔到，侷住去對面喜喜買，但雙髀飯要過百蚊呀 ﹗唯有放棄，轉買普通燒味飯啦。

我地都係想食餐好少少，開心啲啫 ﹗平靚正既再興雙髀飯都只係六十蚊有找乍。

旅行完落機搵飯食！因為已經好夜，加上好攰！所以叫司機去灣仔買燒味外賣（因為快）再返屋企！去到門口排隊買票！因為我要寫食評，收銀阿姐落好單放櫃位，我順手攞起睇幾錢（方便我之後寫）點知我一攞張單，阿姐以成間舖都聽到嘅聲量喝止我：「你做乜攞呢張，你攞走就無嘢食呀！你唔係攞呢張架⋯⋯」我即刻話：「睇下啫！」佢依舊好激動！好像我偷單咁（其實張單都係我order! 個客唔知情咪解釋下，唔使咁激動嘅！我都係第一次幫襯啫！唔好嚇親我呀！不過佢激完，可能都覺得自己激動咗！之後又笑笑下無事！我三個人叫三個單拼（燒肉、油雞、叉燒）分享（咁叫最抵食）食品好快包好！連例湯！即刻片車返歸！打開份量好大，後悔無叫少飯，燒味都好多！先講叉燒：燶邊，厚肉，比較乾！油雞：雞胸背部份，唔夠厚肉，比較嚡，用薑蔥茸好味點！燒肉：好肥，肥多過瘦，所以好淋，似啫喱，皮唔脆係硬！伴碟菜心新鮮爽口，唔錯，飯比較乾，淋了豉油汁好少少！份量大值得讚！個例湯都值得讚，唔味精，金黃色，煲得好濃，而且外賣之仲夠熱！地方普通茶餐廳格局！我只在門口企一陣，但門口都油淋淋！唔算乾淨！

來灣仔上堂揾間茶餐廰食個早餐先左行右行来了呢間喜喜茶餐廰menu太陽蛋火腿方包，蛋有蛋味煎得都幾靚沙嗲牛肉麵，牛肉普通麵底麻麻，個湯太鹹凍奶茶好飲好飽嘅一個早餐

一如其他燒臘茶餐廳，整潔度及舒適度不要有太高要求。

小吃一碟乳豬三寶飯，乳豬拼上叉燒切雞，連飲品一杯$55，都唔平噃！乳豬頗瘦，基本上無肥肉，肉質乾身，幸好主打外皮夠薄夠脆口。

叉燒肉紋有路，鬆軟度中上。

切雞同樣用上瘦雞，口感不夠滑溜。

配上的薑葱蓉亦顯然過鹹。

喜喜燒臘茶餐廳餐單提供港式, 燒臘, 茶餐廳, 冰室等推介美食位於灣仔區，餐廳座位數未知人均消費約$51-100，結賬可以用現金。

您對於灣仔餐廳「喜喜燒臘茶餐廳」有何 comment？

喜喜燒臘茶餐廳餐廳詳細資料：

• 喜喜燒臘茶餐廳地址:
  灣仔史釗域道6號地舖
  喜喜燒臘茶餐廳, G/ F,6 Stewart Road,, Wan Chai
• 喜喜燒臘茶餐廳電話:  
• 喜喜燒臘茶餐廳價錢: $51-100
• 分類: 港式, 燒臘, 茶餐廳, 冰室
• 座位: 未知
• 付款: 現金
• FB專頁: 喜喜燒臘茶餐廳 Facebook

更多喜喜燒臘茶餐廳相關資料:

• 喜喜燒臘茶餐廳分店
• Youtube
• Facebook
• Twitter
• Google