清心齋 沙田

清心齋 評價 相片

有老友大力介紹咁就緊係去try try呢家中式甜品店，買左第一樣係紅棗糕，因為平時係街好少見幾特別咁，個口感比較煙韌，散發住淡淡好香既紅棗味，甜度又啱啱好，每一口都有好清甜天然既味道，應該好啱媽媽爸爸既心水。

第二樣我試左香芋糕，都係因為佢幾特別而且粉紫色好靚好吸引眼球，中間又有芋頭粒同有芋頭蓉，令到口感更加豐富，質感似mousse好細滑，店員話吸引到好多女客人買架，男仔都可以買黎哄下女朋友 下次等我試下馬蹄糕同埋招牌豆腐花先，聽朋友介紹都好正好好味咁

最近有街坊介紹左呢間鋪頭俾我，同我講話呢度啲豆腐花抵食又好味🤩所以今日去街市買水果兼買埋豆腐花自取返屋企慢慢嘆～去到舖頭發現呢到原來唔單止得豆腐花賣，仲有好多唔同款式嘅甜點，難得嚟到就買埋糕返屋企試吓吧😌我買咗馬蹄糕同埋芒果西米糕。

馬蹄糕好爽口，食落有一片片馬蹄係裡面，馬蹄味十足，有陣陣清香既感覺。

糕點既口感很好，咬落去唔會溶溶爛爛既感覺，而且一打開包裝就食得，好方便，用來做早餐都唔錯。

另外一款芒果西米糕都幾好味，好香芒果味，一啲都唔酸，係新鮮香甜既芒果，咬落去都算幾多汁嘅。

而且咬落去有大量西米，加埋椰汁好似甜品咁😚最後講返豆腐花，估唔到份量都幾大碗，真係好香豆味，質感都幾滑，難怪街坊極力推薦呢間嘅豆腐花俾我，的確係唔錯喎！

禾輋街市清心齋唔算好多人識，但我個人食左咁多次都覺得佢水準一路都keep到，都整得幾好味咁，填飽左我同屋企人唔少既肚子，於是就幫佢打個好評啦。

第一樣要介紹就係佢既蘆薈椰汁糕，佢既椰汁糕底有好重好香濃既椰奶味，which is我最中意佢既其中一個特點，甜黎得又好香，香味俱全，佢地mix埋蘆薈粒係中間就令到成個口感更加清爽，個人都好中意蘆薈淡淡既清甜味，而呢個甜品2樣都有曬簡直就係完美哈哈，仲有砵仔糕，香芋糕同埋馬豆糕等等都好好味架！

住喺沙田咁耐都唔知呢度有間清心齋🤣之前喺深水埗有朋友請過我食一次芝麻糕，覺得幾好味，芝麻味十足，口感又好爽口。

我一直都想再食返，但係深水埗又太遠，點知原來沙田禾輋有分店，實在太方便啦🤩今次除咗買芝麻糕之外，我仲試埋芝麻糊、香芋糕、蘆薈椰汁糕同紅棗糕🤩當中我最欣賞就係芝麻糊，大大碗，份量足，味道亦相當好，性價比好高。

聞落去已經好香芝麻味，熱辣辣咁樣食特別香特別濃，不過食完好有飽肚感，所以兩個人share食就會更好😛蘆薈椰汁糕都幾好，好啱當飯後甜品，蘆薈同椰汁都幾match~又唔會好甜。

紅棗糕同香芋都ok，食得出真係好足料，而且唔會好甜好膩，都算係色香味俱全。

唯一美中不足嘅就係街市環境，冇得坐低慢慢食，而店員姐姐都幾有禮貌，好熱情咁同我介紹每款食物。

店員姐姐話豆腐花都幾多人買，我下次會試埋佢哋嘅豆腐花😛

今日經過沙田見到呢間主打糕點嘅小店，有各式各樣傳統糕點，仲有我最愛ge馬蹄糕，就買咗幾件黎試下👀順便買支豆漿解渴，因為天氣實在太熱啦😅呢度嘅豆漿真係好重豆香，入口好香濃。

值得一讚ge係有少糖同無糖兩款選擇，因為我媽咪唔可以食得太甜ge野，所以就買咗一支無糖ge豆漿俾佢~ 就算無糖都唔會淡茂茂，豆味仲更加突出左tim!馬蹄糕一直都係我最愛！以前細細個去酒樓嘅時候成日都要嗌一份黎食😄清心齋ge馬蹄糕入口清香，馬蹄好爽口，兼且無加任何香精，好健康咁。

紅棗糕同砵仔糕都唔錯，兩款嘅口感都好煙靭，尤其係紅棗糕，紅棗味道香濃，但係又唔會有好假個種甜味，食落係感覺舒服ge味道。

而砵仔糕有好多粒紅豆，食落幾Q彈，口感唔錯😆亦都唔會太甜！希望遲啲可以出埋白色嘅砵仔糕，呢個係我兒時回憶黎😄我覺得呢一間ge豆類製品都幾有水準，嚟緊都會繼續支持小店！

清心齋餐單提供粵菜, 廣東, 素食, 中菜館等推介美食位於沙田區，餐廳座位數未知人均消費約$50以下，結賬可以用現金。

您對於沙田餐廳「清心齋」有何 comment？

清心齋餐廳詳細資料：

• 清心齋地址:
  沙田德厚街3號禾輋街市地下M26號舖
  清心齋, Shop M26, G/ F, Wo Che Market,3 Tak Hau Street, Sha Tin
• 清心齋電話:  
• 清心齋價錢: $50以下
• 分類: 粵菜, 廣東, 素食, 中菜館
• 座位: 未知
• 付款: 現金
• FB專頁: 清心齋 Facebook

更多清心齋相關資料:

• 清心齋分店
• Youtube
• Facebook
• Twitter
• Google