南亭 尖沙咀

南亭 評價 相片

燈光暗暗的, 客人不多不滿座一坐低就有甜麵豉醬之類既野, 仲可以加海鹽牛舌 (中等厚度, 燒得岩岩好, 仲有肉汁)豬肉紫蘇卷 (唔係好慣紫蘇既味道, 但係免治豬肉係幾鬆身唔會好硬實)燒飯團 (揀左鰻魚, 熱辣辣燒起好香口, 紫菜仲脆的, 鰻魚份量不多, 配埋甜甜的鰻魚汁一齊食可以填飽少少肚)燒鱔 (皮脆肉嫩) + 豬肉雞骨腸 (普通豬肉腸咁)粟米 (香甜燒粟米,唔會乾晒)芝士雞翼 (唔係幾食得出有芝士係入面, 只係有一堆好似溝左d肉唔知乜既野咁)鹽燒牛肉 (略嫌唔夠嫩滑, 可能牛肉質素係差不多)銀鱈魚 (肥美嫩滑, 同燒鱔各有千秋, 不過略嫌醬汁太多)

都唔記得幾時開始，南蠻亭改咗名為南亭，亦冇深究為何，唔知係轉咗老闆，還是與日本總店關係有變，總之食物水準冇變，我哋都繼續幫襯。

南亭現在有四間分店，分別係中環、銅鑼灣、跑馬地及尖沙咀，對於我哋d新界人或九龍人來講，當然首選尖沙咀店，但今晚之後，恐怕要過海才可以食到啦，因為店長同我哋講，由於大幅加租問題（聽聞由八萬加到二十幾萬），下星期六（即11月12日）後，尖沙咀店將會暫時停業；真是豈有此理，地產霸權當道，居然加三倍租，叫人如何經營下去，只有名牌店或是大財團，才有足夠實力係廣東道立足，混賬。

Anyway，激氣都冇用，今晚一於不醉無歸，先叫一枝真澄七號，$700一支，中價貨色，一向對sake都冇認識的我，好奇地問我身邊的朋友，點解要飮七號，我哋三個人，大號都飮得哂？（我好無知咁以為好似拔蘭地嘅size咁分大號、二號、三號，哈哈哈）朋友解釋俾我聽，七號係代表七號酵母，係真澄酒莊於1946年發現，並屢奪殊榮，係日本有名嘅酵母之一，而且係用山田錦米，以傳統山廢技術釀成，係一支唔錯嘅清酒；先聞一聞，酒香怡人，唔會搶鼻，再呷一口，酒味濃郁芳香，甘醇易飲，不辣喉，不幸口，比起上次係秋田飲嘅淡麗吟釀，更有層次感，更有衝激，果然係好酒一支。

前菜係椰菜、西芹、青瓜和甘荀，全部都新鮮、爽脆，可醮南亭自製醬汁或青海湖鹽，南亭標榜自己為青海天然湖鹽專門店，其鹽粒比較粗，但鹹味不重，而且顏色偏向純白冇雜質，用來食用比較健康，而且食完亦唔覺口渴。

二話不說，先來一客枝豆和雞泡魚乾，枝豆暖暖的上枱，一大碗，份量唔少，亦唔會煮得太腍，有咬感，加上少少青海湖鹽調味，食得份外開心；雞泡魚乾，呈啡黑色透明狀，燒得好，焦焦地，夠香口，有嚼頭，但唔韌，非一般卡拉ok所能做到。

牛肉唔需要燒太耐，所以通常都係牛肉先到，蒜香燒牛肉，有少量蒜茸及大量蔥花鋪喺牛肉面，入口有一陣濃烈嘅蒜香及蔥香，並冇喧賓奪主嘅感覺，反而蔥蒜嘅清新感覺，更能把牛肉嘅肥膩口感冲淡，與燒牛肉味道相襯，而且牛肉並冇燒得過火，內裡肉汁仍然豐富，好食；不過印象中，跑馬地燒鳥亭嘅蒜香燒牛肉，比南亭更出色，有時間的話，真係要再去尋味一番。

再來的，就是燒鵝肝，雖然索價$98一件，但份量十足，鵝肝內亦冇血管、血筋，絕對係法國鵝肝，非平價貨色，外表燒得香脆可口，內裡卻軟腍味濃，雖然鵝肝本身不需任何醃製，但師傅嘅燒功就絕對重要，否則又點可以燒到外脆內軟呢。

燒雞翼，很喜歡日式鹽燒雞翼，雞皮燒得脆卜卜，冇哂雞油，冇哂皮下脂肪，乾身香口，雞肉則依然嫩滑多汁，真正皮脆肉嫩。

燒雞軟骨，係全港最好食，好食不只燒功了得，仲要食材上乘；南亭嘅雞軟骨，細細粒，粒粒都係軟骨，帶少少肉，係真真正正嘅少少肉，絕對唔係坊間嗰d大大粒，肉多過軟骨嘅呃秤貨，加上燒得乾身，非常惹味香口，咬落唔硬，有嚼頭，脆脆的，難得；如果雞軟骨太大粒，就算燒功有幾了得，都冇法將軟骨燒得香脆好嚼，所以坊間大大粒嘅雞軟骨，唔食都知唔好食。

雞皮蝦卷，哈哈，又係雞皮，冇辦法，雞皮確實燒得好，其實雞皮蝦卷，係先用紫蘇葉包著一隻海蝦，再喺外面包一層薄薄嘅雞皮，包得非常扎實，絕對唔會散開；雞皮當然燒得脆皮香口，蝦亦有少許鮮味，肉爽，唔梅，加上紫蘇葉嘅香味，係唔錯嘅配搭，值得encore；不過，南亭仲有淨燒雞皮，記得多年前曾經食過，印象麻麻哋，因為雞皮串疊一起燒，並不是攤開整塊雞皮來燒，燒得不夠徹底，所以有些雞皮部位唔夠脆，而且食入口，感覺亦好似食豬油咁，所以並唔推介。

再來軟骨雞肉棒，就是將雞軟骨剁碎，混入免治雞肉內，再搓成棒狀，加上秘製醬汁燒；軟骨及雞肉都剁得幼細，入口絶冇實崩崩嘅感覺，腍糯之餘，又有軟骨嘅嚼頭，亦係一個唔錯嘅選擇。

三個人，輕易地將整支真澄七號飮清，本來想要支北海道男山，可惜全店只得一支，剛剛被第二枱客要了，店長親自來賠過不是，但又豈是他的錯呢？根本我哋都冇示意店員為我哋留酒，我哋只好開多支真澄七號；但店長非常好客，亦相當健談，仲話有支獺祭二割三分，係早兩天跟朋友飲剩三分一，如果我嘅唔介意，就請我們一起飲，我哋當然卻之不恭，友人仲話呢支二割三分絶對係極品，二割三分係代表精米度23%，即係一粒米，會將77%外層磨走，只剩低23%嘅米心來釀酒，係日本清酒中，幾乎係最低精米度嘅清酒之一，友人記憶中，就只有龜之甲二十二及壹十四嘅精米度喺低過二割三分，一般嘅純米大吟釀，精米度都只不過是介乎40%至50%左右；店長小心地將支二割三分倒入個sake壺中，再斟俾我哋，香味不足，相信是由於已開了兩天之故，但香味優雅，非常清新，呷了一口，順滑圓渾，一種好柔和嘅感覺，你會感覺到d清酒好溫柔咁係你口腔中，行來行去，遲遲都唔捨得離開咁，非常幼細，餘韻悠長，果然係極品；但正正由於佢淡淡嘅優雅，友人覺得清飲或伴以一些比較清淡嘅食物，才可欣賞到二割三分嘅優點，若以濃味食材佐酒，只會糟蹋好酒一支，我亦有同感。

享受完二割三分嘅溫柔，我哋又再次投向串燒嘅懷裡，串燒大虎蝦，非常大隻，肉質爽嫩，亦有鮮味，蝦膏唔算多，ok啦，鹹度亦適中，止於蝦殼，惹味之餘，唔會令蝦肉變質。

燒廣島蠔，有蠔味，略嫌唔夠肥美，不過一啖一隻，亦食得過隱。

燒鵪鶉蛋，雖然並不是什麼名貴食材，但偏偏就不是隨處可以食到，鵪鶉蛋嘅膽固醇份量比雞蛋低，食多一、兩隻都無妨，正因為鵪鶉蛋比較細，受熱部份比較多，所以當師傅把鵪鶉蛋嘅表面燒得焦焦地，加上秘製醬汁，一啖咬落去，蛋黃及蛋白份量唔會過多，掩蓋了醬汁嘅味道及焦皮嘅香口，正。

再來燒白鱔，都算厚身，外表燒得亁脆，加上青海湖鹽調味，把腥味辟走，而且咬落唔會鬆散，少少彈牙，唔錯。

燒粟米亦隨後而至，唔知是否潮流興食得健康，粟米燒完好似冇燒咁，仍然係黃色一枝，所以我哋冒昧要求燒焦一點點；三數分鐘後，我哋與粟米再回面，今次就好得多，明顯地見到有d焦焦地，非常吸引，唔似係日本粟米，但亦非常清甜，粒粒肥大飽滿，好食，自己總是燒不到這種效果。

最後，友人叫了一個梅子燒飯團，而我哋兩口子就要咗個蕎麥冷麵；燒飯團賣相吸引，整個飯團都燒得脆卜卜似的，講真，望落似炸飯團多d，哈哈。

至於我哋個蕎麥冷麵，用一個竹盤，放咗一撮冷麵，上面灑咗幾粒芝麻和紫菜絲，而個竹盤嘅作用，就係用來隔開d水份，令到d冷麵唔會水汪汪，亦方便醮麵汁，除咗一碗麵汁外，仲有wasabi、蔥花、蘿蔔茸，冋一隻鵪鶉蛋，呢隻鵪鶉蛋嘅作用就大囉，簡直起咗畫龍點睛嘅作用，令嗰麵入口滑得多；我習慣先將wasabi放入麵汁攪溶，因為wasabi需要壓溶，所以先處理，再將隻鵪鶉蛋放入麵汁打勻，最後就將蔥花和蘿蔔茸一起放入麵汁，這樣的麵汁，有酸有鹹有辣，有蔥花嘅清香，又夠滑，加上一陣冷冰嘅感覺，非常正；即刻夾了一撮冷麵，醮上精彩嘅麵汁，加上麵條嘅煙韌，絕頂嘅美食。

經過一輪衝刺後，我哋三人都捧腹大飽，但為食的我，又點會放過綠茶雪糕呢？可惜南亭只提供雪米糍，雖然店長已為我哋一添再添，但始終都及不上雪糕球那麼好味和吸引。

食得豐富、飲得滿足的一餐，盛惠$2,800，每人平均$933，多謝好友請客；其實兩支sake已佔了半張單價錢，如不飲酒，每人只需四佰多，絶對唔貴。

可惜11月12日過後，如要品嚐南亭的功架，非要過海不可，實在有點婉惜，希望南亭早日係九龍另覓地址開舖，免卻我們過海之苦，謝謝。

這是我在一月份光顧上三次之食市, 跟同事一次, 介紹朋友一次, 招待放假回歸小朋友一次.每次都保持非常好水準, 服務態度一流, 不得不寫一些 Compliments.本人還覺得比北海道之串鳥連鎖店及其它在日本幫襯過D串燒居酒屋更好食, 每串熱辣辣而且肉汁鎖在其中, 份外Juicy及回味.工欲事其善, 必先利其器, 其中夠Power之燒烤爐功不可沒, 加上師傅準確拿捏燒, 轉, 起, 之時間及立刻傳送到枱上, 以來不及照相已一掃而空.Sorry la. As believed there are many other photos already uploaded. 見到口水到流, 熱切期待下一次. 服務態度亦非常好每次順序order 由清到濃味首先燒豆腐, 青椒, 豬肉露荀卷 豆腐皮脆內滑, 青椒爽脆, 豬肉露荀卷是頭一round 之精華, 熱辣辣而且豬肉汁與露荀配合得天衣無繨,再來燒白膳,雞翼及牛脷 白膳肥美脆口, 雞翼皮脆肉滑, 牛脷則肉質口感豐富, 多汁唔乾最後叫燒羊架及鵝肝慢慢嘆 羊架肉質豐富,多汁, 鵝肝邊邊脆口, 肉地熱辣辣嫰滑, 回味無窮每人叫了一杯唔同果味之果味酒約$35, 感覺比叫清酒來match還好, 有次有小朋友最後多叫了一熱一凍稻庭烏冬,烏冬滑一滑, 凍烏冬也正好幫口腔清一清, 過一過冷河

1月5日, 112週月快樂~~~!! 今晚決定同阿比食d貴夾唔飽大餐慶祝一番~ 喺我地貴夾唔飽嘅選擇入面, 串燒都算係表表者! 左揀右揀, 做串燒做得比較專門同出色嘅, 睇怕都非南亭莫屬~我地先點咗個一人餐~ 都可以試勻好多種唔同嘅串燒! 仲有野菜沙律、麵豉湯同白飯~ 野菜沙律有西芹、青瓜、紅蘿蔔同椰菜, 全部都非常新鮮! 點少少醬汁食有開胃作用, 就咁食又可以refresh下口腔~ 非常好! 燒鳥套餐 (一人前) $198::: 露筍豬肉卷 ::: 聽個名仲以為豬肉係主角, 但我地都係食完先發現, 原來串青BB嘅露筍外面包咗層超薄嘅豬肉… 肉地其實就無乜, 但富有油脂甘香, 包住d露筍燒到又爽又脆, 又唔會太油膩, 好味!::: 紫蘇葉豬肉卷 :::呢個就真係豬肉做主角~ 不過與其話係豬肉卷, 其實佢就似豬肉丸多d! 豬肉燒得乾身之餘夠juicy~ 切碎嘅紫蘇葉混入豬肉卷中滲出香料味, 令味道更清新.::: 冬菇 :::冬菇仲保持到少少juicy, 燒過之後菇味更濃郁~ ::: 青椒仔 :::好有趣~ 平時好少食呢隻青椒… 細細條燒到軟淋淋, 外皮少少脆, 一d都唔辣~ 反而仲有少少清甜味~::: 雞肉大蔥串 :::一舊雞肉隔一段大蔥卡罅卡罅咁間開. 雞肉鮮味, 但唔夠彈性~ 大蔥好香, 雖然外皮有d燶, 但內裡都頗嫩, 不錯!::: 雞肉串 :::淨雞肉味道略鹹, 不過就可以最直接食到雞嘅肉質~::: 雞頸肉 :::好有趣! 第一次食~ 每舊肉都係細細舊細細舊咁~ 食落有d硬硬脆脆, 但就唔太有雞味.::: 鵪鶉蛋 :::一串三隻~ 好味! 燒到d蛋白開始有少少硬, 但內裡d蛋黃仲係粉粉地~ 正!::: 銀杏 :::唔會燒得過硬過乾, 味道甘甜, 不錯~::: 南蠻燒牛肉 ::: 呢個一般~ 牛肉味唔夠濃, 肉質有少少韌, 但面頭d燒汁幾惹味!::: 牛舌 ::: $54名物! 真係無敵~ 又彈牙又嫩! 牛味比牛肉更濃郁~ 黑椒又好惹味~ 好好味呀!!!::: 鵝肝 ::: $98有d求其地將呢個全餐最貴嘅單點同個一人前d串燒擺埋一齊… 鵝肝表面有層薄薄地嘅粉衣, 已經燒到脆卜卜~ 內類就保持油潤~ 算係唔錯~ 不過就唔算係必食.::: 粟米 ::: $35食串燒梗唔少得呀菲最愛嘅燒粟米!!! 差唔多等咗成餐飯先燒好上菜~ 一嚟已經忍唔住食咗一條先影相…粟米外衣燒到脆卜卜, 咬落去卜一聲爆出鮮甜玉米汁~~~ 真係好好味!! 直頭係比雪糕糯米糍更好嘅甜品!!::: 飯團 ::: $20 x2飯團亦係南蠻嘅名物之一, 同呀比一人一個~ 我地要咗一個三文魚一個饅魚餡. 有塊新鮮紫菜包住嘅飯團外面飯粒燒得焦脆乾身, 直頭近乎飯焦質地, 好香口! 飯團內部則保持軟熟甜糯~ 老實講其實餡料味道唔算濃, 但在外脆內軟嘅飯團包圍下, 餡料反而屬於次要了~成日都覺得食串燒係貴夾唔飽, 但原來唔洗好貴都可以食飽飽~ 今次大包圍式試咗好多款唔同嘅燒物, 樣樣野都幾好味! 加上可以直接望住師傅喺串燒爐密密燒, 食物未入口已經感受到師傅嘅用心~ 正所謂慢工出細貨, 由於真係即叫即燒嘅關係, 有部份食物都真係要耐心d等候先有得食! 不過喺等食時可以欣賞下師傅嘅功架, 都可以算係晚飯嘅一大娛樂~

日式爐端燒專門店，配一壺清酒，頗適合三五知已邊吃邊傾計。

串燒款式繁多，整頓飯點了十多二十款。

較好吃的有牛舌、(普通)雞翼、牛肉稻庭烏冬及粟米。

不作推介的有日式芝士年糕，紫菜腍的，芝士味唔夠香，年糕囗感一點也不煙韌，似吃薯蓉多一點。

其餘款式評分都OK喇，未算很突出，其餘食肆也不難做到差不多水準。

您對於尖沙咀餐廳「南亭」有何comment？

南亭餐廳詳細資料：

• 南亭地址:
  尖沙咀廣東道122-126號中港中心2樓
  Nan Tei, 2/ F,122-126 Canton Road, Tsim Sha Tsui
• 南亭電話:  
• 南亭價錢: $201-400
• 分類: 日本菜,爐端燒,串燒,串燒店,
• 座位: 80
• 付款: Visa,Master,現金,AE,diners
• FB專頁: 南亭 Facebook

更多南亭相關資料:

• 南亭分店
• Youtube
• Facebook
• Twitter
• Google