嵐本 天后

嵐本 評價 相片

喺附近返工，食飯黎黎去去得嗰三間好食，嵐本係其中一間。

同事鐘意食隔離半島，講真，嘢食係非常好，但我自己覺得半島嘅節奏太快，食嘢有少少壓力，有時候想靜靜地食個飯，俾自己休息吓，我就會黎嵐本。

香港生活節奏已經快到嚇死人，如果食飯都要好急，真心會覺得好大壓力😗。

呢度嘅餐牌好簡單，早餐、午餐、常餐、下午茶，唔會花多眼亂，最適合我呢啲有選擇困難症嘅人。

而且呢度嘅姐姐會好貼心咁話我知有乜揀：火腿腸仔定餐肉？炒蛋定煎蛋？多士定奶油豬🐽？總之你就算唔識字，都可以喺度食到自己想食嘅嘢(不過唔識字就唔會睇到呢度哈哈哈🤣) ！今日黎食午餐，例牌要咗我最鐘意嘅蔥油雞扒撈麺🐔！超大塊厚雞扒，嫩滑又 juicy，加上蔥油嘅香味，食到停唔到！啲麺嘅軟硬度都啱啱好，完全唔知廚師點做到。

通常想食奶油豬，要去大家樂下午茶先食到，但喺嵐本，早餐或者午餐都有得食！！我鐘意又香又脆嘅奶油豬仔，返咗半日工，黎一絲甜甜嘅煉奶，生活就係需要多一點點甜，先有動力撐埋下半日 ❤黎呢區返工幾個月，慶幸有呢間小店，照顧咗我一日兩餐，真心推介俾大家，不過我有少少私心，希望唔好成日咁多人，因為我唔想等太耐 LOL 😆

嵐本係炮台山其中一間幾多人食嘅餐廳，價錢唔算好貴，但質素認真麻麻。

.呢日我食咗佢哋嘅葡汁雞球飯（ $52 ）。

.葡汁嘅椰汁比例頗多，所以食落算香滑，但啲雞球煮得太耐，所以冇晒肉汁，食落又有雪味。

.而且佢唔連蔬菜，所以變咗啖啖肉，唔balance。

炮台山好多嘢食，我個人最支持小店。

呢間嵐本位置唔多，但係坐得好舒服，老闆娘都好好服務同態度，重點係啲嘢好好食。

午餐每三日轉一次餐牌，日日黎食都唔會厭。

同事揀咗滑蛋叉燒飯，同旺記有得揮！蛋好滑叉燒好夠味。

另外常餐就好抵食，叫咗一個雞扒撈麵，雞扒好大塊，蔥油好多，如果雞扒嘅汁多啲就好了。

常餐仲有跟炒蛋同奶油豬，炒蛋真係好滑好好食，奶油豬就差啲，比較林，好似放咗好耐咁。

但撈麵主食係好食嘅。

另外其他同事叫咗3號同4號午餐都係扒餐嚟嘅，份量都好多，食到大家下晝做嘢都好眼瞓🤣🤣👍🏻

每朝入去店員都會有禮貌地講早晨😊地方乾淨舒服👍早餐多選擇～最特別係有紫薯麥皮餐連埋火腿蛋👍仲有多士同豬油豬揀～$28算好抵食👍👍如果早餐可以賣埋鮮奶就更好更健康啦🤣🤣

之前係「四寶食堂」，而家唔知係咪轉左手，見到餐牌都同之前嗰間差唔多就打算入嚟食。

午餐價錢都偏貴🐷豬扒蔥油撈麵（$52）配炒滑蛋及奶油豬豬扒煎得好靚😍仲有撈麵真係冇得頂🤤😋但係呢度啲蔥切得好大粒😅麵都可以煮得腍啲。

🍅鮮茄濃湯牛肉湯麵 轉通粉（$50）配炒滑蛋及奶油豬 轉多士鮮茄湯真係好濃，但係偏甜。

牛肉都好腍，都有幾多塊。

一舊舊番茄就冇乜啦，但係有唔少蘿蔔🥕。

多士烘得好靚，脆同埋牛油搽得平均。

炒蛋就比較油同埋比較淺色冇乜蛋味，冇咁出色。

🌽粟米肉粒飯（$53）唔係同平時學校嘅粟米肉粒飯一樣，呢碟D肉粒大粒好多（所以價錢都貴過叉燒飯😅），同埋粟米汁唔係結果隻比較濕，視乎你鍾意邊個版本嘅粟米肉粒飯😉。

🐔白切雞飯（$55）唔建議叫白切雞飯，份量比較少同埋雞唔夠滑，但係又未到嚡嘅程度。

我要求雞胸佢都有俾☺️，但係份量實在太少。

飯比較乾唔夠腍😕嘢飲都唔細杯，檸檬茶夠濃👌🏻總括嚟講，食物質素唔去特別出色，價錢又唔係特別平，侍應都有落錯單，我就唔會特登來幫襯啦😶

嵐本餐單提供粵菜, 廣東, 茶餐廳, 冰室等推介美食位於天后區，餐廳座位數未知人均消費約$51-100，結賬可以用現金。

您對於天后餐廳「嵐本」有何 comment？

嵐本餐廳詳細資料：

• 嵐本地址:
  天后炮台山京華道9-27號富利來商場地下45-48號舖
  嵐本, Shop45-48, G/ F, Fu Lee Loy Mansion,9-27 King Wah Road, Fortress Hill, Tin Hau
• 嵐本電話:  
• 嵐本價錢: $51-100
• 分類: 粵菜, 廣東, 茶餐廳, 冰室
• 座位: 未知
• 付款: 現金
• FB專頁: 嵐本 Facebook

更多嵐本相關資料:

• 嵐本分店
• Youtube
• Facebook
• Twitter
• Google