食家粵菜料理 佐敦

食家粵菜料理 評價 相片

個幾月前有朋友介紹此間食店 , 當時都沒有留意 , 雖然近地鐵出口 , 不過佐敦真係少野行少野買 , 之後留意有雜誌及報紙介紹 , 最後約了 3 位朋友去試下 .當晚訂了 8:30 p.m. , 我們早了10分鐘到 , 可能上一轉的客人未走 , 等了一陣才可入座 , 門口都幾好 , 唯一唔好就係行人路窄左 d , 兩人平頭行已經沒有空位 , 早年德興街是好多人行 , 當晚所見 , 德興街差了很多 , 全條街小貓三四隻 , 食店依然有七八間 , 有時想想他們都好難生存 , 條街冇人行 .茶水好快已送上 , 不過我覺得 d 茶淡左少少 , 可能我習慣飲濃茶 , 周圍環境都幾舒服 , 光線充足 , 我們坐了中段卡位 , 當晚點了 : 招牌黃油雞半隻 + 碧綠班球 + 鵝肝醬牛仔骨 + 豉油煎沙巴老虎蝦 + 蒜容粉絲蒸凡立貝 + 粒粒黃帝菜 + 士多啤利骨 + 北海道奶凍 .由於全部係男仔冇人影相 , 個個一上菜就搶食 , 哈哈 .招牌黃油雞 $118 , 我地比佢八/九分 , 好好食 , 雞肉好滑 , 好似炸子雞 , 但食落去又唔似 , 好難形容 , 比起附近金山的雲英雞更好食 .碧綠班球 $2XX (唔記得) , 七分 , 味道都 ok , 不過油太多了 , 而且我地唔多食西芹 .鵝肝醬牛仔骨 $148 , 七分 , 牛肉都幾好 , 不過咸左少少 , 用來送酒/送飯都幾好 , 淨食就咸左 d .豉油煎沙巴老虎蝦 $58/隻 , 我地每人一隻 , 九分 , 好香好好食 , 蝦肉彈牙 , 有蝦味 , 好香口 .蒜容粉絲蒸凡立貝 $28/隻 , 我地每人一隻 (限定只可以每人一隻 , 原來唔係 , 之後我地問經理 , 以前特價 $1 /隻 , 才是每人一隻 , 而家可以叫多幾隻都得 , 我地下次一定叫多 d) , 九分 , 凡立貝都好鮮味 , 蒜容味都夠 .粒粒黃帝菜 $88 (經理介紹 , 時令菜式) 八分 , 粒粒係肉粒 + 冬菇粒 + (唔知的粒粒) , 上湯煮 , 比想像中好食 .士多啤利骨 $88 (好似係) 八分 , 炸得好香 , 面脆內軟 , 有肉汁 .北海道奶凍 $25/位 , 九分 , 雖然好細碗 , 不過真係好香好滑 , 有奶香同椰香味 , 正白飯 $10 , 真係有驚喜 , 九分 , 有飯香 , 軟硬剛剛好 , 出面好多都冇飯香 .經理都提醒我地 , 如果想坐得舒服 d , 最好八點半後才來 , 因為少 d 人 .我地食到10點才走 , 全店只餘低我地 , 希望佢地可以生存到 , 起碼下次再試其他野 .

有朋友住佐敦，知道依間個廚師之前系香格里拉既廚師，價錢又5太貴，所以就1齊去試下。

去到見到門口有好多証書同相最後果然都冇令人失望，特別系蒜蓉粉絲蒸帆立貝真系好正，一啲都唔腥，咁岩做緊優惠一蚊一隻大家1定要試下！仲叫左黄油雞，本身睇到諗住無乜特別，但係食落好有驚喜，好嫩滑另外，仲有梅菜扣肉，個人食開清淡野，所以覺得有少少咸整體都覺得幾好，位置又方便，食物有水準！！

今日媽咪生日，本身諗住去食buffet但係佢話想食中菜，又醒起之前聽朋講過話依間新開張食過一次話唔錯，就同屋企去試下我四個人，叫左四個送，一個湯蒜蓉粉絲蒸凡立貝，黃油雞，牛仔骨同一個菜心，加每日精選燉湯個扇貝好夠味但又唔太濃，唔腥但又帶得出扇貝既鮮味，唔似係其他中菜餐廳食果啲好重味。

個黃油雞好特別，幾有雞味！皮脆肉嫩，入味又唔老。

另外牛仔骨同菜心好有家庭菜feel，味道岩岩好。

好意外地個湯飲得出係足料靚湯，唔係味精湯。

最後老細仲請我俾我地食楊枝甘露，好足料，甜度岩岩好整體唔錯，值得encore！

其實都係第一次寫食評今日都係同屋企人行開街諗住順便試下呢間新開既菜館位置都唔太難搵係NATHAN RD 轉個彎就到入面環境都好好有卡位又有大台因為其實大家都唔算太肚餓所以都無叫得太多BB乳鴿之間食開屋企附近果D都好重味佢個乳鴿一放出來已經好香咬落都唔算太好油仲好脆連咬亦同尖位都好易咬開咬斷隻雞本身已經好有味都唔洗用到D沙薑或者薑蓉雞肉都好嫩好滑當然雞有D位都有DD肥啦但係佢個皮都有D脆皮既感覺當然唔可以錯過既就係新開張既優惠1蚊1隻帆立貝  (1人限定1隻)不過實在太肚餓食完先諗起無影相

有一段日子沒有一家人一同晚飯, 是晚就來了佐敦的新店子食家粵菜料理再次相聚. 這裡位置是幾便利的, 在地鐵站出來, 走不用兩分鐘就抵達. 店子不算大, 不過環境就是幾舒適的. 我們坐在卡位上, 亦算幾闊落. 看看餐牌, 發覺也有不少菜色是跟夏宮有點相似, 再看看店方的介紹, 才知道這裡是跟夏宮有點淵源, 且看在價位平宜一大截的情況下, 變身成主角的主理人在處理菜色的水準又會如何.椒鹽香脆豆腐 $28: 7分, 先來一客前菜, 就是椒鹽香脆豆腐. 想不到的是份量是相當之大, 當作是其中一道主菜吃也足夠. 豆腐是炸得相當之熱辣辣, 也幾脆口的, 不過就稍嫌乾身了點, 亦未算太香滑. 另外, 店方沒有附上醋, 這樣子剩吃椒鹽豆腐, 好像有點缺欠呢.秘製鵝肝醬焗牛仔骨 $128: 6分, 接下來的就是主菜的時間, 秘製鵝肝醬焗牛仔骨是夏宮的其中一道招牌菜色, 來到食家粵菜料理, 價位只是$128, 當然是相當經濟的定位, 不過水準只是一般. 雖然店方聲稱是用上了新鮮鵝肝醬, 但吃到尾也覺得鵝肝是不太入味, 不太能夠吃得到鵝肝的味道. 還好的是牛仔骨質感尚算不俗, 肉質不會太實.蒜蓉粉絲蒸日本北海道帆立貝 $1 x 4: 8分, 在店子新開業的期間, 大家來到這裡, 當然不要錯過這個大優惠, 說的就是$1一客蒜蓉粉絲蒸日本北海道帆立貝, 每位只能叫一隻, 那就叫四隻吧. 帆立貝份量十足, 蒸得火候對辦, 肉質嫩滑, 帶鮮味, 配上底下的蒜蓉粉絲同吃, 自然是相當惹味. 只要$1一客, 無論是價錢或者質素來講也是不能抗拒的.秘製招牌黃油雞 $98: 7分, 另外一道主菜就是秘製招牌黃油雞, 一隻賣價$188, 我們四個人, 不能吃得太多, 就只要半隻, 賣價是$98, 也是相當合理的價位. 這客雞, 感覺上是比較肥, 部份雞件更是脂肪比肉更多, 如果想吃得健康一點的話, 這道菜色就不太合適了. 還好的是雞肉很嫩滑, 也入味, 加上價位經濟, 都是吃得過的.正宗擔擔麵 $38: 3分, 單尾方面選擇了一客正宗擔擔麵, 也是店方的推介菜色, 想不到水準實在相當強差人意. 當然, 這裡是粵菜館, 點選一客擔擔麵好像有點奇怪, 但既然店方又推介, 又說成是正宗, 也想看看究竟是甚麼葫蘆賣甚麼藥. 先說湯底, 味道是相當淡, 沒有辣味, 跟平日吃開的完全不一樣. 只是在面頭加上了點點辣椒及肉碎, 就算撈勻吃, 也帶不出個味道. 麵條方面亦未算很彈牙. 這客正宗擔擔麵, 令人意想不到呢.北海道奶凍: 8分, 原本這客甜品是$25一客, 但是晚店方因為新張關係, 就免費贈送的. 店方用上了北海道的牛奶, 當然是奶香十足, 但特別之處是加入了椰汁, 椰香味道清新, 跟奶凍是幾有趣的配合.整體來講, 食家粵菜料理的菜色是有得有失, 當中只賣$1的蒜蓉粉絲蒸日本北海道帆立貝是必吃推介, 而北海道奶凍也是有水準的. 服務方面, 店員態度友善. 至於價位, 埋單每人$91, 計及是晚菜色的陣容, 實在是很相宜的價錢. 當然, 以店子的背景來講, 我還是會有比較大的寄望. 不知道店子在站穩陣腳之後, 水準會否向上提升了. 

食家粵菜料理餐單提供粵菜, 廣東等推介美食位於佐敦區，餐廳座位數未知人均消費約$101-200，結賬可以用Visa,Master,現金。

您對於佐敦餐廳「食家粵菜料理」有何 comment？

食家粵菜料理餐廳詳細資料：

• 食家粵菜料理地址:
  佐敦德興街18號德成軒地下
  食家粵菜料理, G/ F, City18,18 Tak Hing Street, Jordan
• 食家粵菜料理電話:  
• 食家粵菜料理價錢: $101-200
• 分類: 粵菜, 廣東
• 座位: 未知
• 付款: Visa,Master,現金
• FB專頁: 食家粵菜料理 Facebook

更多食家粵菜料理相關資料:

• 食家粵菜料理分店
• Youtube
• Facebook
• Twitter
• Google