賓墟快餐廳 屯門

賓墟快餐廳 評價 相片

沙嗲牛肉麵必食，舊屋邨，傳統香港味道，牛肉份量足夠，湯底好好味道，吾系純滾水，配煎雙蛋是我的至愛，沙牛汁配蛋汁配麵，一流既享受。

價錢合理，味道好。

吾系而家d新型冰室可比

行過見好多學生食緊飯，就膽粗粗買個外賣試下，買左個咸魚雞粒炒飯+凍檸茶，$46，同區嚟講唔係特別平好肚餓返到屋企即刻食，一打開個飯已經心知不妙，個飯望落去好濕，食落口仲要係一舊舊嘅，而且雞肉係得十粒左右，好難食，好濕，一pat pat咁叫人點食呀😡明明好肚餓但都食唔落，食到一肚火😫杯檸檬茶又一般，個茶底唔夠味，都係唔會想飲落去咁開得餐廳賣食物，建議做得認真啲，有一刻諗會唔會我自己炒仲好味過佢個廚房呢？超級不建議的餐廳😤

又係男友帶路去到大興邨，附近既商店都係停留左係8、90年代咁，入到賓墟好有細個既感覺，鮮黃色既枱，膠托盤，懷舊既水吧，牆上既雪碧掛鐘！牆上有快餐、餐牌上仲有常餐、特餐好多選擇。

本身係想試下焗飯，但係因為有啲趕，安全起見叫左個煙肉石斑飯，至於男友就叫左個揚洲炒飯！真係好耐無食過呢隻茄汁味，佢唔係平日街嗰隻茄汁，反而好似細細個成日都食到嗰隻味，唔係話特別好味，但可以食得返呢隻味都幾開心！我嗰個係快餐，除左熱飲，仲送左個餐湯！見到隔離枱既港式漢堡，下次有多啲時間都想試下！唔單止裝修Keep到懷舊，連味道都Keep到！如果你地都想味覺懷舊下，不妨黎呢度試一試👍

本人住了大興邨廿多年,除了阿媽既佳餚外,賓墟快餐係我由細食到大既好地方。

港式快餐係陪伴着無數香港人成長既美食,她也不例外；雖然數年前裝修過,但都保留了港式快餐店格局,一個用雪碧做背景既時鐘,不是隨處可找到。

水吧職員也忙過不停為食客提供新鮮熱辣既美食。

如果有選擇困難症的話相信你見到餐牌會怕怕,幸好店員也不會焦急般問你想吃什麼；但我二話不說點了一碟粟米肉粒飯。

老火例湯隨晚市附送,也可轉糖水；雖然味道談不上好喝,但附送已算不錯~由細食到大既粟米肉粒飯 ($33),外表可能不算吸引,但忌簾汁做得很濃,粟米粒粒分明,豬肉也大大粒,飯算有米香,且不軟身；廿多年不變既味道,一碟$33既飯,每一啖都食返自己細個既回憶~今日胃口太好,點了一個芝士牛肉漢堡( $17 ),牛肉漢堡係人手打,有點像紅磡時新快餐,不過芝士再溶多一點就完美。

大興邨不經不覺都有數十年歷史,終有一天會清拆,每當有空時讓我好好留住這份屋邨獨有既味道吧!!!

好耐冇去賓墟啦，一開始係細佬同老豆有日去左食，之後就間唔中有食開。

其實大興村細細個睇醫生果時都有去開，一直好好奇呢間餐廳係點樣，本身因為好少機會去舊式既快餐店，所以一有機會就會去試下，今日突然心血來潮，就去回味下。

坐低已經見到一大塊常餐既menu，係一般茶記貨色，冇咩特別期待，叫左一個白汁海鮮飯配凍OT，等左5分鐘，終於有得食，以一般快餐店黎講佢並唔算快，但碟飯就好大，堆到好似個小山丘咁，汁同料足到一個點!滿滿既白汁包裹住每一嚿海鮮鮮魷、蝦、蟹柳...竟然仲有埋炸魚真係有啲驚喜，海鮮配白汁真係一流!仲有差唔多四分一隻既青紅椒，加埋味濃而帶點稠既白汁...簡直可以想像到完全係七、八十年代冰室轉型做茶餐廳果時既風味，佢係令我清哂成碟飯既原動力。

懷舊既格局加埋屋村既小風味，大推!

賓墟快餐廳餐單提供多國菜, 快餐店等推介美食位於屯門區，餐廳座位數40人均消費約$50以下，結賬可以用現金，Booking訂位可以電話致電 24622767 查詢。

您對於屯門餐廳「賓墟快餐廳」有何 comment？

賓墟快餐廳餐廳詳細資料：

• 賓墟快餐廳地址:
  屯門大興村大興商場2樓5號舖
  Ben Hui Fast Food, Shop5,2/ F, Tai Hing Estate Shopping Center,, Tuen Mun
• 賓墟快餐廳電話: 24622767
• 賓墟快餐廳價錢: $50以下
• 分類: 多國菜, 快餐店
• 座位: 40
• 付款: 現金
• FB專頁: 賓墟快餐廳 Facebook

更多賓墟快餐廳相關資料:

• 賓墟快餐廳分店
• Youtube
• Facebook
• Twitter
• Google