麗斯餐廳 何文田

麗斯餐廳 評價 相片

當年既麗斯,用上高級西餐廳格局吸引顧客,我細個成日都覺得呢間野好高級好貴,不過大個左,亦因為年月既變化,加上麗斯完全冇重新裝修過既緣故,麗斯由以前既高級餐廳,慢慢變成大人細路都會入黎食既餐廳...我由於係愛民村土生土長,所以對於麗斯有種情意結,佢地既芝士肉醬焗意粉,真係一流!!!我係出面都仲未食番到咁既味道,一用叉整d意粉,你就會見到濃郁既芝士係入面....個種濃烈芝士同肉醬味,依家係出面個個為左慳皮而偷工減料既餐廳跟本冇可能食到....仲有佢地既麵,亦都非常好食,而且多元化,無論丸類至到一般腸仔蛋,到上海都可以加落公仔麵度,食落又另一番風味@@至於飲品方面,其實可以唔嗌就唔好嗌,因為真係麻麻,我地永遠都好少嗌野飲,除左叫扒餐/晚餐既時候先會逼住嗌,因為凍飲冰非常之多,個杯非常之細,而且茶多過奶,一陣苦味....大多都係飲維他既可樂算數....侍應方面,某幾個其實都幾好人,有時唔使加錢都會整杯可樂俾你飲,又時又傾下偈,一齊睇下電視,都幾寫意....亦因為比較少人去既關係,所以坐落都算寬闊....仲有佢地既早餐,魚柳即叫即炸,大塊夾抵食,呢個係我阿媽講既,但我因為由細到大趕住返學返工既緣故,一直冇機會試....可惜可惜....其實佢地賣既食物唔算好貴,但比起附近既大排檔同茶餐廳,始終貴少少,所以亦令佢地人流較少...不過每到lunch,成個餐廳都逼爆學生,老師,附近上班人士!!!佢地既鐵枝扒餐,仲係用一隻牛既款式既鐵板黎上檯,非常懷念....真可惜,愛民村人口老化,減少....如果唔係,呢間餐廳,我相信會吸引好多人去食....

作客愛民村之Sunday leauge後,與眾隊員拉大隊下午茶,隊員食咩都無咩所謂,唯一要求係要坐得舒適,仲要食得煙.行到去愛民商場,有間麗斯餐廳.正合乎眾人要求.而且有直播賽馬.最緊要係,$20一個tea set.照計此店應該有超過廿五年歷史,計落我都係大少少.環境介乎茶記同港式老西之間.沒有金鳳,金雀般陰沉,來到絕對唔會Mood in love.客路應該係來自區內學生哥,同村內居民多.愛民村咁大,附近學校網龐大,所以在村內屹立廿幾年,必有其因.茶餐有雞翼薯條之小食,亦有公仔麵,三文治等,大多隊員在開波之前,連午飯也未吃,差不多個個都要公仔麵,仲係煎蛋回窩肉公仔麵.連凍飲$20.廿皮一個set,唔寄望有大量回窩肉比你,面頭的荀,辣辣地幾惹味.麵條又唔係煮到過淋,合格有突.對住個大銀幕,望住告東尼搭徐君禮之組合,又贏一場.幾個麻甩波友身水身汗,來個賽後報告.呢個周日下午,沒有美女相伴,一樣過得非常寫意.賽後雙腳酸痛,似乎已暫擱一旁.

麗斯，我只能俾個「服」字佢：如果換轉其他區，甚至隔離村，佢好可能已經係無人記得既歷史陳跡。

麗斯十年如一日：即係無變過。

「裝修」o左既麗斯，不礙乎係換過o下梳化位上塊布之類，個格局完全無變過。

與友人聚舊於此。

以為個$40 晚餐係燒雞沙律餐或者西班牙牛扒餐，點知係燒雞沙律+西班牙牛扒（有薯菜）既晚餐，仲有濃得好緊要+多青椒既紅湯（紅汁似D）、doublesize 既大餐包、仲有甜品、茶啡 想唔食到飽上頸都唔得。

我無講過佢好食，只是佢份量其大而已，但都偶有佳作：例如全線「芝士焗」類同印尼炒飯，跟餐就算加埋凍飲都$40 有找。

佢唔靠裝潢，唔靠宣傳，唔靠service 都可以企硬咁耐，皆因來自愛民四方八面既莘莘學子同來自學校、土木、房署既仝工。

我都係愛民子弟..好懷念麗斯&天馬!!以前o既麗斯真係幾巴閉ga...唔係好多機會食得到~~上年都番過去食一次..咁多年d裝修一d都冇變過!!(扮舊式餐廳??)野食就一般啦..餐飲真係好細杯,兩三啖就飲完!!不過麗斯&天馬..我會推介天馬..又平又好好好好味!!eg..免治牛飯..粟米豬扒飯..仲有炸薯條..etc!!好多配搭..又抵食..唔知而家仲keep唔keep到以前o既水準ne?!?!

裝修舊, 伙計服務差, 食品麻麻.無乜野好,只是食左咁多年, 食開有感情.

麗斯餐廳餐單提供西式, 西餐廳等推介美食位於何文田區，餐廳座位數未知人均消費約$50以下，結賬可以用現金。

您對於何文田餐廳「麗斯餐廳」有何 comment？

麗斯餐廳餐廳詳細資料：

• 麗斯餐廳地址:
  何文田愛民村愛民商場2樓F25舖
  麗斯餐廳, Shop F25,2/ F., Oi Man Shopping Centre, Ho Man Tin
• 麗斯餐廳電話:  
• 麗斯餐廳價錢: $50以下
• 分類: 西式, 西餐廳
• 座位: 未知
• 付款: 現金
• FB專頁: 麗斯餐廳 Facebook

更多麗斯餐廳相關資料:

• 麗斯餐廳分店
• Youtube
• Facebook
• Twitter
• Google