勝香園 中環

勝香園 評價 相片

如果大家對於大排檔嘅印象中仲係叫餸食飯、食煲仔飯嘅話就錯曬，呢間大排檔一樣都係食充滿港式風味嘅嘢食，喺茶餐廳、冰室一定會食到嘅奶油脆脆同呢排香港人好鍾意食既茄牛。

香港有好多咩咩園，好似樂香園、紹香園、蘭芳園，但一講起中環、奶油脆脆、茄牛，大家就會諗起勝香園。

勝香園係一間喺中環大排檔嘅粉麵店，呢間老字號係中上環屹立左半個世紀，係家族式經營。

開業於1959年，勝香園以前是係玉葉甜品個個位，係30幾年前先搬黎歌賦街依邊，大家睇中勝香園，除左係佢既野食之外，唔多唔小都係這種露天式既大排檔風情，夠街邊夠地道。

所謂既大排檔即係街邊檔攤，環境簡陋，外觀多以鐵皮同帆布組成搭建。

全盛時期係二戰後，政府為因公傷殘或者殉職既公務員解決生計，所以發牌照，係街頭租金負擔低既情況下經營。

不過由於衛生環境欠佳、阻街、市區整建等好多原因，1980年代前後政府開始唔再發放新牌照、補償金鼓勵持牌人繳交牌照，禁止轉讓同繼承舊牌照權利等措施，令呢一種街頭文化快速式微。

直至2009年政府先有所意識，決議宣布大牌檔保育計畫，協助建設同環境翻修。

呢家香港大牌檔已經唔多，大家數到既係油麻地、深水涉，大排檔式微都係令人想去勝香園既原因。

喺未疫情之前，呢間大排檔一直都係旅客必食嘅人氣店，以前的確要排成半個鐘到一個鐘，即使而家冇左遊客嘅人潮，小店都係接近滿座。

店舖堅持慢工出細貨，所以食佢哋嘅嘢食都要有啲耐性，喺繁忙嘅午膳時間，落完order等半個鐘都唔誇張。

主打蕃茄面同埋脆脆，餸、麵同湯底都可以任意配搭。

位置離地鐵站唔算話好近，係歌賦街，第一次嚟嘅話會有啲吃力，唔想行得辛苦可以經自動扶手電梯，係結志街落沿着上環方向行就會見到，佢嘅對面就係同樣昔日人氣嘅米芝蓮美食九記牛腩，以前會見到勝香園一條人龍、九記一條人龍，附近正正就係今年亞洲50餐廳之首嘅大班樓。

前後食過兩次勝香園，兩次都係星期六晏就去，因為佢星期日唔開門，大排檔環境當然簡陋，枱面座位都唔可以講係非常乾淨，不過上面會有雨傘、遮棚，中午時期唔係坐最出嗰幾個位，基本上太陽曬唔入嚟，有提供幾把風扇，雖然環境唔理想，但依然高朋滿座，唔使等位不過去到接近滿座。

餐牌只有簡單嘅兩頁紙，第一頁就係佢哋嘅麵食，可以自由配搭唔同既餸，但可以睇到佢右手邊全部都係蕃茄字頭，所以已經話俾你知蕃茄就係佢哋嘅招牌。

而另一頁就會見到其他多士、三文治同飲品。

枱上面會有基本嘅醬料，好似同辣椒醬同胡椒粉。

1️⃣ 奶油脆脆 💰21（👅: 9/10）食過幾次佢既脆脆上枱擺盤都係差唔多，好似米奇老鼠咁，脆脆都係即叫即製，上枱熱辣辣，比起蕃茄麵呢個更加要趁熱食，因為咁先保持脆口。

呢度既脆脆同多士都係用800W多士爐，麵包特別揀選半機械、半人手製造，奶油脆焗得好香好脆，係我食過咁多個脆脆最脆嘅一個，第一口咬落係會偏硬少少，但咬完落去就係非常脆嘅口感，脆到係身邊嘅人都會聽到有聲，隨即就係脆脆入邊嘅鬆軟口感，脆到好似食緊餅乾咁，呢一種嘅鬆脆度食過咁多間茶餐廳都做唔到，食完會諗係咪越簡單嘅嘢越難做得好食。

而奶油份量非常足夠，食落係偏甜，有一啲已經滲咗入去脆脆入邊，所以食落唔會話好乾身，如果唔係咁鍾意食好甜嘅人未必接受到，牛油檸檬汁蜜糖會更加適合，食落係非常邪惡但就係滿足無比。

2️⃣ 牛油檸檬汁蜜糖脆脆 💰21（👅: 8.5/10）檸檬汁食落清香，會食到牛油香，所有調味都搽得非常之均勻，口感清新，令人耐人尋味。

牛油檸檬汁蜜糖比起奶油冇咁甜，食落會冇咁膩，因為檸檬汁會稍為中和蜜糖既甜，酸味會比甜味出啲，所以食落係開胃，但個人會鍾意奶油多啲，今日食落唔夠喉唔夠過癮。

要挑剔既係食脆脆一定要用手羅，用筷子基本上夾唔到，但勝香園無提供清潔用紙巾或者濕紙巾，要自備一下。

3️⃣ 蕃茄牛肉蛋通粉/麵💰36（👅: 8/10）呢度既蕃茄底用炒香過嘅茄膏、新鮮蕃茄、雞湯等熬製而成，至於其他配料都係任意配搭，有10幾款選擇。

上枱時係熱辣辣，湯底呈紅色，但唔係濃稠嘅湯底，蕃茄湯飲落非常濃郁，甘濃起沙，蕃茄味非常重，係夠酸，而酸味係黎自新鮮既蕃茄，而唔係人工嘅酸味，茄膏嘅甜味唔算好出，係天然嘅味道多啲，酸味會比甜味多好多，食落非常之開胃。

而蕃茄嘅數量都幾多，真材實料，食起嚟淡淡茄肉，而且已經煮到腍身，接近變茄蓉嘅狀態，成個湯唔會話好油，係一個好多主打蕃茄湯嘢食嘅餐廳時代，呢個蕃茄湯都係可以佔一席位。

略嫌湯太多，對比起蕃茄同牛肉嘅數量，所以上枱時基本上係睇唔到牛肉，沉晒底，用匙羹不上嚟先見到牛肉其實係唔小。

鮮牛肉份量都係唔會孤寒，雖然細塊，但是對比起其他店舖，食起嚟係好軟嫩多汁，食得出好新鮮，唔算鞋唔算韌，牛肉軟諗程度，唔係好似茶記咁用肉鬆粉，所以食落唔會有鹼味，肉質食落都係自然。

牛味就唔太食到，不過喺大排檔、茶餐廳來講，牛肉只要咬得開已經好足夠。

煎雞蛋就不過不失，唔會話煎到窿咗，蛋黃起碼仲係流心，蛋黃既甜味同蛋香味會比蕃茄既酸味蓋過，下次會試下炒蛋，感覺食落會變炒蛋蕃茄。

通粉會比麵更加索湯，因為佢個空心可以令到更多湯同茄蓉滲入去，通粉食落唔會話煮到好腍，軟而不粉，係合格嘅通粉。

麵係用出前一丁，麵質我係幾鍾意，因為佢煮到偏硬身少少，而唔係腍身，個人食麵類都係鍾意硬身啲，因為腍身完全冇口感可言。

4️⃣ 凍奶茶💰15（👅: 8/10）凍奶茶以絲襪奶茶既作法黎整，飲落夠凍，夠香滑有奶香味，奶味會比茶味重，所以飲落整體甜味會比較夠香滑有奶香味多。

如果鍾意奶味濃一點既朋友，呢杯奶茶肯定係你杯茶。

🌟酸甜嘅蕃茄、腍滑牛肉、爽滑嘅通粉，食落開胃飽肚，價廉物美，身為香港人好難抗拒呢一種美食，看似做法簡單，但要將三者完美咁結合，非常考大廚火候控制度同埋食材嘅新鮮度。

香港有好多主打蕃茄湯嘅餐廳，好似蕃茄師兄、red object、蕃滿門、華嫂、樓下冰室、星座冰室等等，勝香園作為香港茄湯既始創者，絕對唔會比下去，嘢食當然唔係好精緻好打卡，但勝在水準係有。

茄牛通、茄牛麵、鹹檸七、奶油脆豬簡單樸實已經好好食，絕對係香港人既comfort food， 如果我住附近，一定會成日黎食。

以前仲有好多遊客個時，勝香園出名店員服務態度差為名，改單會態度差，而且堅持唔比加單，係呢一段艱難時期，幫襯過兩次都感受唔到澳牛式服務，賣單讚姐姐計數快仲笑笑口有傾有講，可能生意大不如前，人龍店都要變得嫌虛、禮貌一啲。

冇晒遊客嘅情況下，勝香園已經唔使點排隊，兩次去都係可以即刻坐低唔使等，不過夏天嚟食就會比較熱啲，因為始終係露天大排檔，冇冷氣得風扇，而且喺馬路邊，但大排檔就係食呢一種嘅特色，呢一種嘅懷舊味道，冬天喺呢個露天地方吹着風食碗熱辣辣麵可能會更舒服。

喺呢個疫情嘅時期，小店買少見少，再加上呢一啲鐵皮檔嘅大排檔，碩果僅存，唔知幾時會因為政府一句話收返，到時想食都冇得食，就只可以變成大家嘅集體回憶，所以無論係想一試大排檔風味，定係一試好代表到香港特色嘅奶油脆脆，定係要帶外國朋友一試香港特色、但外國不常見既美食，除左諗起歌賦街既九記，呢間人龍店勝香園都係我既口袋名單。

👅味道: 8.5/10🍴環境: 6/10💰消費: $70 (服務費: NA)

百吃不厭既勝香園牛油檸檬脆脆🥯黎到勝香園除左茄牛通必食之外，脆豬都係必點。

如果食得太多一般茶記的奶油豬，覺得悶的話。

就要試下呢一度的牛油檸檬脆脆。

超級香脆，一要落去chop一聲，加埋牛油同檸檬醬簡直係絕配！茄牛通🍅番茄味好濃，可以看出落足料，牛肉係有少少厚度，比較有嚼勁，而且好重牛味。

配通粉一起食簡直一流！最後仲有一杯凍奶茶本身叫左少甜，但感覺上味道都偏甜一點。

但茶味會比奶味再出少少。

仲有貓店長陪你用膳，開針😜

因為朋友同勝香園好熟所以佢係會叫三蛋牛米，我就梗係招牌茄牛通啦，多士黎講朋友揀咗厚多士. 我次次都係嚟食茄牛通，一如既往濃蕃茄味，厚多士非常脆。

一坐低姐姐已經話唔好坐嗰度呀！因為一陣太陽會曬到，即刻安排咗我哋坐係冇太陽曬嘅地方坐。

「勝香園」—————————————————店舖地址： 中環美輪街2號排檔—————————————————勝香園喺香港都有好多年歷史,以前次次去親都大排長龍, 唔少外地遊客都慕名而來,疫情之後, 人龍仍然喺度 但情況比以前好一點!!!!!! 今次黎到嗌左兩樣嘢食,牛油檸檬汁蜜糖脆脆, 一上到枱好脆好熱,少少檸檬味加埋蜜糖好夾! 唔漏!!😛😛之後,叫咗勝香園嘅名物, 蕃茄野! 一個茄雞翼米, 另一個係茄蛋牛通!! 😋😋😋湯底一如以往極濃郁 有少少茄肉 果然係真材實料!❤️❤️💯

係中環好出名既勝香園必食是常識吧! 成日都唔知個價錢點計，次次都會叫哂我想食既配料等佢計😂😂叫左份鮮茄餐肉雞翼公仔麵，鮮茄湯底有好多茄蓉，湯底好濃茄味，好正。

餐肉同雞翼就正常發揮。

平民化既食物，平民化既價錢👍🏻

勝香園餐單提供港式, 茶餐廳, 冰室, 大牌檔, 懷舊老店等推介美食位於中環區，餐廳座位數35人均消費約$50以下，結賬可以用現金，Booking訂位可以電話致電 25448368 查詢。

您對於中環餐廳「勝香園」有何 comment？

勝香園餐廳詳細資料：

• 勝香園地址:
  中環美輪街2號排檔
  Sing Heung Yuen, G/ F,2 Mei Lun Street, Central
• 勝香園電話: 25448368
• 勝香園價錢: $50以下
• 分類: 港式, 茶餐廳, 冰室, 大牌檔, 懷舊老店
• 座位: 35
• 付款: 現金
• FB專頁: 勝香園 Facebook

更多勝香園相關資料:

• 勝香園分店
• Youtube
• Facebook
• Twitter
• Google