canton pot 旺角

canton pot 評價 相片

早排窮L幫主P先生生日，有朋友C小姐相約安排生日飯局，地點就揀咗大家都近嘅旺角區兼啱啱由L'Hotel改咗名做Nina Hotel旗下旺角薈賢居(Lodgewood by Nina Hospitality) 嘅Canton Pot，自限聚令，已經好耐無打過邊爐，雖然依家有返晩市堂食(只可去到晚上10點)，但只限4人，第4位朋友就係K先生，C小姐就booked咗一間細VIP房，回想當年響呢度打邊爐，我哋係成8個10個一齊，成枱嘢食先夠震撼，唔知幾時先可以一大班朋友坐埋一齊食飯。

人未到齊，先點咗一壺竹蔗茅根水同一壺洛神花茶，竹蔗茅根水清甜解渴，而洛神花茶我就無飲到，之後仲叫咗枝Estrella Damm Inedit嘅啤酒，由窮L幫主自己一個隊哂，不過仍然戒緊酒嘅我就當然無飲；未點湯底前先混一混醬，有2行共12款醬料，其中一行有蔥花、蒜蓉、豆瓣醬、日式胡麻醬、金蒜粒同鮮洋蔥粒，另一行就有指天椒、廖孖記腐乳、自家製麻辣醬、花生醬、潮州辣椒油、同自家製沙爹醬，另外再叫服務員攞最近市場上人氣急升嘅食材：芫茜，無芫茜點打邊爐呀？湯底就點咗花膠燉響螺湯拼韓牛肋骨湯，牛就有點咗本地新鮮牛頸脊、美國頂級無骨牛肋片同騸牯黃牛吊龍，豬就有西班牙橡果黑豚肉，海鮮就有海中蝦，仲有四寶丸、精選餃子拼盤、響鈴卷、酥炸魚皮，蔬菜就點咗皇帝菜、有機菠菜同山藥，最尾加咗一客三色麵拼盤。

湯底一滾，率先飲咗花膠燉響螺湯，湯頭清甜、花膠嫩滑，人越嚟越大，就要補一補；再食埋另一邊湯底嘅牛肋骨，肉質細嫩，夠哂入味，真係一分錢一分貨。

食咗3款牛，本地新鮮牛頸脊、美國頂級無骨牛肋片同騸牯黃牛吊龍，牛頸脊係牛頸位下橫膈膜後嘅部位，肉質鮮嫩爽滑，肉味濃郁；牛肋片肩腹肉後方嘅部位，油花均勻，肉質嚼勁；吊龍，牛嘅兩邊腰脊肉，又叫肉眼邊，油脂豐富，香滑可口。

西班牙橡果黑豚肉，係食橡果嘅豬，令到豬肉帶有獨特嘅榛子芳香，味清不燥；海中蝦上枱時仲識郁，非常新鮮，肉質彈牙鮮甜。

四寶丸有鯪魚球丸、豬肉丸、蝦丸同墨魚丸，全部都自家製，肉嫩彈牙，我較為鍾意係蝦丸同墨魚丸；而精選餃子拼盤有羊肚菌豚肉餃、海皇餃同泡菜野菌餃，喜歡食餃子嘅我，皮薄餡鮮，全部都好食，我比較鍾意嘅係羊肚菌豚肉餃，裏面餡料足又夠多汁。

另外響鈴卷同酥炸魚皮，響鈴卷新鮮即炸，一上枱已可即食，熱辣辣酥脆香口；酥炸魚皮一樣脆香惹味；而蔬菜我只食了山藥同有機菠菜，山藥健脾補肺，仲要唔係咁多火鍋有得食，想食爽脆嘅山藥就唔好淥咁耐，而淥耐啲就會有粉嘅質感，視乎自己想食爽定粉；有機菠菜健康又爽甜。

最後追加咗一客三色麵拼盤，有蕎麥麵、菠菜麵同蝦籽麵，單看麵嘅乾爽程度已經覺得啲麵好食，全部麵都爽口彈牙，我就比較鍾意蝦籽麵，可清楚食到蝦籽嘅鹹香味，基本上我真係好鍾意食麵，可以一日5餐都食麵。

已經非常飽，想點甜品/糖水之時，爭啲忘記咗仲有窮L幫主嘅生日蛋糕，好彩截得切啲糖水，唔係就浪費，生日蛋糕係芒果拿破崙，芒果鮮甜，千層酥皮仍然酥香鬆化，吉士醬質地濃厚，甜度適中，窮L幫主P，生日快樂。

事源今日要賀一位重要的人的重要日子，所以想搵一個可以開心傾到計嘅地方，邊食邊講。

首先呢度地點好方便，唔似其他旺角地方又迫又多人。

第二，呢度有房，雖然都係四人一枱，但係間隔音好好，唔怕大聲嘈親人。

第三，呢度啲侍應好好，好nice, 尤其經理Simon Lee, 非常好禮貌同埋好細心，安排得好到位，影相會幫我地熄左個爐先，唔叫都會自動出現，令我地唔會冇嘢飲。

食物方面：象拔蚌刺身應該是野生，大片大片上，鮮甜冇腥臭味。

特色餃子，試左羊肚菌餃子同芝士餃，一試芝士餃即刻愛上，味道持久難忘。

特色湯品，菌湯，味道不太特出，但豬骨湯一上枱即畢一杯你飲，味道很好。

肉類，雞係嘉美雞，肉味夠又唔肥，豬肉出色，牛肉中上，不宜滾太久。

小食方面，魚干同炸皮蛋都非常好吃，送酒一流，還有Simon Lee 貼心送上剛炸好的魚皮，正！最後，環境一流，酒店級水準，服務亦是上上之選，食物優質，價錢合理，若要三五知己開心聚首，開心邊食邊傾而又唔受外界騷擾，此處真係一個不二之選。

今日同朋友慶祝榮升之喜,來到廣東道薈賢居二樓canton pot,首先講交通方面,接近太子地鐵站,地鐵行過來五分鐘就能到，十分方便。

其次裝修方面,十分華麗,有多間房間供客人選擇,如果著重私隱度的客人，這店鋪是不二之選。

另外我們一到場 經理simon已好細心地，詳細介紹店鋪的皇牌食材給我們,例如象拔蚌,肥牛,新鮮丸類，雞肉等等打甂爐食材,比出邊任何一間店舖,都優勝不知多少倍，最重要是價錢絕對大眾化（還有食到最後，所供應的甜品，可以說食到回味無窮）總括來說,今晚在這裏聚餐，無論在服務，食材，或在裝修上，絕對值得讚賞。

香港人真係好鍾意打邊爐，因為一班朋友圍埋一齊，一邊傾偈、一邊烚吓烚吓，氣氛特別好。

今晚一班friends約咗喺旺角打邊爐，我記得之前食過呢間位置有啲隱蔽嘅Canton Pot，佢哋宜家做緊一個自選海鮮promotion，於是就提議不如嚟試吓。

我記得呢度嘅湯底好正，今晚趁人多就試兩個湯底：龍蝦湯底（配龍蝦刺身）仲有花膠湯底（裡面嘅花膠夠哂份量）大家都急不及待即刻飲返幾碗湯先開始打邊爐。

然後就係食物方面，不得不提呢個2+2嘅海鮮套餐，每人自選2款活海鮮+2款冰鮮海鮮，我揀咗嘅組合有刀貝蜆、鮑魚、美國桶蠔、阿根廷紅蝦啲海鮮全部好鮮甜味美，朋友揀嘅蟶子大大隻，攪到我下次都想食蟶子。

打邊爐一定要食嘅肥牛，我地點咗牛頸脊，睇相都知，啲紋理靚到呢！就好似九龍城方榮記啲靚牛，真係入口即熔。

然後我哋仲叫咗西班牙橡果Iberico 黑豚肉，真係好大驚喜，平時食過iberico ham，原來黑豚肉用嚟打邊爐都可以咁出色，肥瘦均勻，肉味比其他豬肉都香濃，印象深刻。

呢度嘅魚皮又係必食，好薄好大塊，就咁食入口勁鬆化，索兩秒湯先食就有湯底嘅精華。

Canton Pot嘅餃子係自家製，我地今晚試吓羊肚菌餃子，味道健康。

蔬菜方面，喺呢度會試到好少見嘅花生苗，爽脆多汁，我地個個都好鍾意。

飯後甜品都唔錯，有多款選擇，其中推薦creme brûlée 同宇治抹茶紅豆。

呢間打邊爐由湯底、火鍋料、甜品都相當唔錯，真心推薦。

天氣驟降，又係令人想蠢蠢欲動打邊爐的季節。

今個星期就約咗幾位好久不見的朋友烚吓烚吓，選址在係Y小姐主場，Canton Pot。

還記得呢間野係我朋友C小姐介紹，以前佢話食過返唔到轉頭，成日都會嚟打邊爐，因為餐廳夠隱蔽夠舒適。

跟佢食過幾次Canton Pot，都覺得水準一流，非常穩定。

因此，久不久都會翻兜。

限聚令六個人，我們剛剛好，選兩個煲，三個湯底，幾貪心都會滿足。

一個花膠燉響螺湯底，一個龍蝦湯底，龍蝦刺身另上，呢度嘅湯底，一路都好出名，先飲為敬。

龍蝦刺身，輕灼2分鐘，那種鮮甜美味令人難以忘懷。

個人最喜歡花膠燉響螺湯底，啲花膠真係多到食極都食唔晒。

講返今日嚟Canton Pop嘅原因，正正因為呢度推出左海鮮2+2嘅新玩法。

平時叫海鮮，大家各有心頭好，你想食呢樣，佢想食嗰樣，可能因為價錢種類有分歧，最後都唔知點叫先好，搞到頭都大埋。

呢度推出呢個海鮮2+2，$168一個價錢，你可以分別選擇兩個活海鮮同兩個冰鎮海鮮，乜嘢問題都自然解決晒。

活海鮮有愛爾蘭蟶子皇，刀貝蜆，鮑魚同中蝦你選擇，冰鎮海鮮有珊瑚蚌2片，貴妃蚌2片，美國桶蠔1隻，阿根廷紅蝦1隻，隨你鍾意點揀就點揀。

我選咗蟶子王，鮑魚，桶蠔，阿根廷紅蝦，全部都係大件夾抵食，質素也好，件美國桶蠔，大得震撼。

以$168，平均$42嘅價錢可以有咁高質素嘅海鮮，真係好難得，還記得上次係大紅袍打邊爐，一隻蟶子王，索價$70，由酒店Manage嘅餐廳來說，真係平到無朋友。

加上T先生帶來的秋酒，和海鮮配合到天生一對。

呢度嘅本地新鮮牛頸脊，絕對係必選之作，大家今日戰鬥力普通，才叫兩碟。

牛舌也是水準之上，薄切嘅牛舌味道還是十分濃郁。

吊龍的肉味，令我想起潮州的潮汕火鍋，當你邊度都去唔到嘅時候，你特別掛住外地嘅月光。

C小姐話一定要西班牙橡果黑豚肉，可能我哋太愛牛肉嘅關係，次次都會遺忘咗呢度嘅豬都係不得了，全枱都不停讚好。

炸魚皮同三色麵，係我次次必點嘅菜式，呢度嘅麵好精彩，一定要食。

今晚嗰個原來都係午餐肉fans，見係咁，恭敬不如從命。

呢度嘅餃類都係非常出名，羊肚菌黑豚肉餃，又係次次必點。

澳洲M5芝士和牛餃，睇都知幾好，芝士同牛肉夾埋一齊，好難令人抗拒，最後要再度encore 。

田園菜藍，食到飽最好用來幫助消化。

最後還有呢度嘅最愛花生芽，甜甜的又爽又可口。

尾聲的甜品，又係震撼嘅環節，一人選一樣，我最愛還是木糠布甸 ，老婆選的綠茶紅豆意大利白酒奶凍，也不錯。

canton pot旺角廣東道1131號香港旺角薈賢居2樓

canton pot餐單提供粵菜, 廣東, 火鍋, 無肉餐單, 酒店餐廳, 咪嘥嘢食店, 少鹽少糖食店等推介美食位於旺角區，餐廳座位數70人均消費約$401-800，結賬可以用Master,AlipayHK,支付寶,現金,AE,銀聯,JCB,OpenRice,Pay，Booking訂位可以電話致電 39687888 查詢。

您對於旺角餐廳「canton pot」有何 comment？

canton pot餐廳詳細資料：

• canton pot地址:
  旺角廣東道1131號旺角薈賢居2樓
  canton pot, 2/ F, Lodgewoodby Nina Hospitality| Mong Kok,1131 Canton Road, Mong Kok
• canton pot電話: 39687888
• canton pot價錢: $401-800
• 分類: 粵菜, 廣東, 火鍋, 無肉餐單, 酒店餐廳, 咪嘥嘢食店, 少鹽少糖食店
• 座位: 70
• 付款: Master,AlipayHK,支付寶,現金,AE,銀聯,JCB,OpenRice,Pay
• FB專頁: canton pot Facebook

更多canton pot相關資料:

• canton pot分店
• Youtube
• Facebook
• Twitter
• Google